Haolenphai le Smart City thu kichai, tua International Border Township. Aban le ipi?
By: Jalun Haokip (MSW), Social Worker, Western Australia. Email: jalunhaokip@gmail.com Written on 30 January 2016.


Tumasanga Manipur Government in Moreh kom a Haolenphai a eimite gam acre 3000 (three thousand) jen a len lahpeh ding anagut a Kuki Students’ Organisation-GHQ hon chomchakhat aboipinung a tunigei a khoiva kibenglha banga athipsan nung uva Thadou Students’ Association-General Headquarters (TSA-GHQ) makaina a 2014 a kipat a phat sottah imumanlou hela lungthim, tha le jung, sum le pai tamtah lut a kho haosapa, khomite le kiloikhomna dang dang le mipi toh kitho a Manipur sung le TSA-Delhi makaina a Delhi a Jantar Mantar changei a kiphinna anakinei a ana kiting a hahsatah a ana kihuhdoh a August 2015 a Indian Government in India gamsung a smart city 100 list phondohna ananeina a Manipur a dia Haolenphai/Moreh hilouva Imphal ahin hisah nung a hung kihainom a lungmong a hung kium pan pan anahi. Ahinla, 15 January 2016 nikhoa International Border Township kiminputsah a Haolenphai gam acre 2000 (two thousand acres) pehdoh nading guhthim a kibol ahia hung jahdohkha soi kikaina lekhapheng a kisun thu chun nampi le gam le nam ngailu jouse lung asunagam tan ahi.

December 2014 le January 2015 sung chun TSA ho tohgonna noi ah keima tah resource person (thupisei) hina in Kuki In Imphal le Haolenphai khomuntah ah smart city idiuva aphatloudan, govt in eiho nopnalouva gam imohlahpeh thei u ahiloudan, thinglhangmi hina a land le cultural rights (igam le ichon namlhah thu a thaneina) ineihou le gam huhtup angaidan thu ah seminar anakibol in anahethemlou cheng in jong hetthemna ananei in ahi. 3 January 2015 nikhoa Haolenphai khomun a seminar kineini chun Haosapu le khomi hoa kon kipathu tamtah kanajah lah a upa khat in kakom ah tuni nang thusei hung ngai hih leng munchom a kichondoh dinga anaum kahitai, tun vang dettah le lungmong tah a inchen khosah kabolding government in hunam a ibol ule jong kimaitopi dia kaumding ahitai ti’n kipathu ahungsei in keijong kana kipahlheh in ahi. Hiche seminar a chu KSO Moreh lamkai cheng jong hungpang uva lolhing tah a ana kibolchai a gam huhkhom dia kinoptona jong ana kinei ahi. Ahile tua itidan a tuchung athahbeh a hitobang a gam johdoh nading natoh ahung umkit hi doudalna aneilou u ham tihi mipi, adeh a athu hecheng, in phamo akisalheh in ahi.

Pupa gam huhbit ding ahi tia declaration nei dan a kiseile, Haolenphai thu a japi het a paotheilou bang kisa a, ahivanga asunglang a gam johdohding anakitindoh lungnatpi kei Kuki Inpi Manipur (KIM) ho jong Haipi declaration atiu chu atah ahile tribal kihingal a tribe thu seitah loudi ahi tia Kuki nampi tinggu a hung pang jing recognised tribe khat douna thu gospel (huhhingna thu) dana alhangsap lele sang uva amasachung a aumchan u kijapi louva tuahi gam huhna a pan alah phat u ahitai. Kijoulhepna smart city a pata Haolenphai gam huhdoh ahijouva KIM lamkai ho meeting khat (evidence recording whatsApp a kilhathang) ah smart city adelmang uve tia gam huhho chung a lunghang pum a lainatah a ahoulimnao kajah doh chu kidang kasahbeh lou vang in vangset um kasalheh e, ahinla tun jong gam huhna ding phat akipel naipoi.

Amasachung a chu Manipur government in Central government kom a smart city a dia proposal anathot a Centre a kon donbutna ima anaumlou vang a gam lahding anagut ahin, tuchung hin kidangtah in government a kon a gam thumna aumlam jong kihekhalouva numeikijoh (prostitute) ho bang a Manipur chief minister pa heng a gam acre 2000 kapedoh nom uve tia asutnau lekhathot (letter of submission of willingness) athot thei u chu sum dei jeh hinte tichu japi ginmo hijong le ipijeh mong dihtah hiding ham amahobou (gam johdohgo ho) vin ahet u ahitai.

Smart city project jong Indian government in kiletsahtah a aseithu ahin asemdoh nading sum le pai alungkhampi ahi’n tua sum le pai thu a Centre a kingam le state capital Imphal a sewerage project jong tugeija chaijoulou le a employee ho tolop jong aphatcha a pejou jilou Manipur government in hoilang sum le kitahna akilah a International Border Township thahbeh khat asemgut ahidem ti igelle lungdon aum in ahi. Hitobang project aumdile state assembly a athu seikhomna le kinielna (discussion & debate) umding chujou teng plan le budget thua resolution pass kibol masa ding ahi. Akisei township project hi centre project ahilam jong akihekha pon state project ahilam jong akihekhapoi. Chuche malah 15/01/16 nia a project min akijah le gam pehdoh dia nopna soi ana kikai chaisa ahichu thil kidangtah ahi. Smart City hihen lang International Border Township hihen lang ipi min kisah hijong le thinglhangmite gam lahtheisahna a kiminsah/kibolgo ahibouve ti akicheh in ahi. A project min ngainom aume aumpoi tithu ahipon namdang khut a gam phaldohlou ding ahi tithu ahibou ve.

Smart city chu ei thinglhangmi milhom thalhom te dia aphatlou chungchon a smart city project criteria ho dungjui ja Moreh/Haolenphai a khat aumtheilou ding chu hetsa anahi in gam lahthei sahna a kipaomepi ahi tichu anakihe ahi. Smart city umding ikidelmang uve tia tugeija laina pona ho’n ageldiuva dei um chu gam chu ana kipedoh tahen lang hile tuala smart city project umchom lou ding agamla mia hitading, smart city eiho dia phachom diham tina jala anadeisah ho chu tua hi kisihdiu ahivanga bongnoi kibosa kapi bep kihi ding ahitai. Gam man a sum kilah ho jong chun asum u akijahchaiman tah diu ahi. Kitohmo lheh jong leuhen Pathen in iumpiuva gam le nam ngailu ho jala Haolenphai pupa gam huhdoh a anaum ahi.

Ahile tu’n Haolenphai a International Border Township/Commercial Township kisemdi ahi kiti hi atah ahikhah jong le ipiham itobang hiding ham ti lekha a akimulou jeh in seithei ahitah tah poi, ahinla namdang atamte le aboltheite, tichu, Meilheite thuneina dile kinotna ding khopi/town thah khat hiding ahi tichu het jeng thei ahi. Agamnei indigenous minam hina a agam a thaneina constitutional protection, tekah a anempen a 6th schedule, aum a eimiho/tribal ho bouvin gam aneithei ding vai ahomthei ding ahile vang agam a population toh kitoh a township thah khat semthei ahinai, achutiloule imanthah nadiu ahi tichu hetsa ahi.

Thu kajahkhat atah ahile Manipur government in Haolenphai gam alahtheilou phat in 2015 kumlhun kon lang October vel chun Chandel district Moreh phah masang 20 kms a um mihem 370 chenna Meilhei kho Kwatha ah township khat semdoh nadia Kwatha te agadoi ule Kwatha ten kagam uva township akibol le keiho thingpoh loulhona le gam lenna ding umlou ding ahitai tia ada ule government in jong seiding theilouva ahaisan u anahi. Ahile itidan a hiche thu a Moreh lang a mipi le agamsung a cheng ho ngansena chang jong hilou mi li hon gam ahinjoh kit u ahidem lungdon umtah ahidohtan ahi.

Kwatha te chu scheduled caste Meilhei ahiuvin township akisem jong le athanei ding le achenglut ding chu anamchankhompiu Meilheite mama ahijeng vang a gam aphallou ule itidan a tua eimi gamjoh hon namdang khut a gam apehdoh gut jing u hintem tihi mipi/nampi ang a hilchetna apeh u ngai ahi. Kwatha ten iti ham in phatsah jong leu Kwatha hi eimite chenna thinglhanggam sunga um ahijeha hilaimun a Meilheite khopi khat ahung kisem le eimite hamsetna hiding ahi ajeh chu mi ahungchenlut le hung thaneidiu gam jong ahinkeh diu hung thanei cheh cheh diu ahi lungmit a muphahleithei ahi. Hijeh a chu Kwatha a hitobang township umding tohgon aumle umthei lou ding ahi tia ipan u ngai nalai ding ahi.

Namdang midang kom a gam pehdoh hi ingainao ahipoi, custom le culture toh kikal ahi tihi ihetsao ahitoh lhon a ikhut a umcheng huhtup a min ilahpeh cheng u jong lelahkit a kivaipohna tum umdohsah ding tia hinkho le thisan phalngam a thalchoi nam sepai kiloikhom jong tamtah inei u ahi. Ahile, Haolenphai gam pehdoh nadia mipi hetnalou le phalnalou va Moreh a dia phatkhat lai a kineppi tah a anakinei civil kiloikhomna Hill Tribal Council a president Pu Jangmang Haokip, Kuki Chiefs Association Moreh a president Pu Jamkholen Mate, Pu S Haopao Haokip, Representative le tumasanga amin jong ana kijakhalou beh Gary T Haokip kiti khat Respresentative kiti hon gam johna in 15/01/2015 nikho in Moreh a HTC office mun ah soi kaina neita jong leu agamkai a nam sepai hon itidan a gam huhna a kikiumlouva amohvet uva hitobang gam le nam manthahna ding natoh umthei hintem tihi mipi lungdonna tahkhat chu ahi tan ahi.

Mipi lungdonna dang khat chu ahile soi kai mi li ho lah a representative kiti teni khu koi hija koi chule ipi respresent abollhon ham? Hiche hi mipin hilchetna angaichat ahi. Ip hile hichea gam pehdoh nadia soi kai ho lah a japi natohmun lo hohin mipi/nampi ajoulhep jeh uva moral responsibility akilah uva nampi/japi na atohnau va pat a lunglhaisel a haidia lomtah ahitao ve. Ipi chu hitale nampi le mipi anga ngaidam akithum uva asoikai u akinunglah lou ule namdang te koma pupa gam johdohna dia soi kai tia kiheden diu ahitai.

Gam pehdohnomna lekha pehlutna thu hung kihetdoh jou jou 18/01/16 nikhoa TSA-GHQ in hiche thua press release anasodoh nauvah chun nasatah in demna le nielkalna ananeingal uvin ipithu umhenlang itihchan hijong le gam le nam huhna a mipi toh kithokhom a pan alahdiu dan thuphon anabol tao vin ahi. Hiche ah chun gam pehdohnadia soi kai hon jong asoi u akinunglah diu vin ngehna ananei un achutiloule mipi lunghanna akikoudohuva nampi doudal a kiladiu ahi anatiu vin ahi.

21/01/2016 nikho a Eimi Times a hung kiso dung juijin Haolenphai Haosapu jaumtah Pu Lalkholun Haokip le Village authortity Secretary pan khomite thalheng in thuso anabol in hiche ah chun Haolenphai gam International Border Township a dia Manipur government pehdohna umding lam ahetphahloudan ule itihchan hijong le gam huhna a pan alah uva hiche nadinga mipi kithopina ngehna ahin nei u jong kicheh tah in ahinsei tao vin ahi. Hiche chungchon ah 20/01/2016 a Haolenphai kho Haosapa le Secretary soi bolna TSA-GHQ henga ngehna lekhathot ah jong namsunga Thadou khangthah ten gam huhna a apanpi diu vin ngehnna ananei tao vin ahi. KSO te jong panpina thumna ngehna lekhathot anakipe in ahinla alamkai hou vin ipi alouham athu a-im mang uve akiti e. Hiche ngehhna hi mipi le namsung a organisation ho jousen gelkhoh a pankhom angaitan ahi. Inamsung uva civil kiloikhomna kalval in thalchoi group ni a kon in jong ahiding lomtah in Haolenphai gam huhnading thuphon anaum in ahi.

Hitobanga a gam huna ding thu akihasei lai in 21/01/16 ni chun Churachandpur munkhat ah Haolenphai Haosapu le agou lothei achate changei chu gihna khoutah toh kithon gam pehdohna ding lekhapheng (ipi kijih ahi kihelou a kisei) chung ah hunam in SoO group khat in dan toh kikal in soi abolsah taove tin tahsantheitah in social media (facebook le whatsApp) ho ah ahung kiseikit tan ahi. 24 le 25 January chun keima nopna tah a gam kapehdoh ahinai tina lekha khat Haosapu soi bolsah din Moreh a pansa loikhat in anokit uvin ahinla Haosapu in soi akaideh tapoi tin tahsantheitah in social media ah ahung kiseithang kit in ahi. Hihe thu ho hi adih ahi ahilou vang phat khat leh hung kihethou thou ding ahi.

Itidan a ajeh kichehlouva gam kijohdohgo jeng thei ham tia lungdon um akisahlai tah in gam johdohna dinga soi anabol mi 4 ho maman soi abolnao lekha kisodoh khat (dated Moreh, the 25th January 2016) ah chun SoO group khat in abolsah u ahidan ahin seidoh tao vin ahi. Eimi Times a jong 27/01/16 nia hung kiso hiche alekhaso uva hilchetna aneinauva chun khantou machalna umding deina a kibol ahin smart city ikidelmang uva Imphal a umdia akichonmang nung a Haolenphai a township project ichan uhi ikilah lou ule Naga ho le Kwatha ten jong achu u ahijeh a lhaso ding kideilou ahi tin asei uvin ahi.

Hiche thua hi inamsung uva hetnom jeh a kidohnom thu themkhat aum in ahi. Namsung a khantou machalna dihtah umthei nadia gam johdoh ngai ham ahiloule political autonomy ngai masa ham ti thudoh lentah aumdohsah tan ahi. Khantou machaldi deina jala igamsung uva ithaneinadiu (political rights) idel u hilou ham? Gam akijohdoh nung a hiche gam a chu thaneina le chanvou akineitah loule hiche gam chu khangtou jong le idiuva ipi phachom ham?

2014-2015 kumsung a smart city project min a Haolenphai gam lahdi doudalna a TSA lamkaina a kiphinna sangtah aumlai jong chun smart city hi ikilahloichal lou ule India le Myanmar gamgijui a umcheh cheh Naga area (Ukhrul district sung) ahiloule Churachandpur district sunga um Behiang a kichonding ahitai tipou vin mi dipchahsah nading le lheplhah nading bul le bal umlou thu tamtah anaging in ahi. Hiche donbutna khat chu ahile adei ule kilahtao vinte, min adeichat man a idia phachomlou ding khat dei ding ahipoi ti ahi. Adihtah chu ahile kichonding ahitai kitina mun a mihoa kon koimachan smart city deina a tunigei a demand abolkhalou u ahi. Smart city chu Haolenphai a anaum ding hingel jong le ideilou jeh uvin Moreh/Haolenphai a pat in akichon mang tai. Ahile thu kisei ho chu atah ahile itidan a Ukhrul le Behiang a kichonlou va Imphal joh a kichon hintem tihi anaseihon ahilchetdiu bat anei nahlai u ahi. Imphal a smart city tundoh nadia iti dan a government in gam athumlam kihekhalou, lah jong alahlou beh hintem tihi geldohjing ding angai e.

Akiseidoh nom chu ahile Smart City hihen lang Inetrnational Border Township/Commercial Township hihenlang ipimin kisah khopi ahiloule itobang khopi hijong le adei ule ibola tua jong demand abollam u kihekhalou ham? Adiuva pha a akigel ule amaho thu thu ahi’n amaho chang inte timan mei mei a idinga hamsetna thilkhat chu deichat a kilah ding ahipoi. Akisei dang khat jong chu ahile gam hi nomleu hen daleu hen Manipur government in alahthou thou diu ahi hijeh chun kijohdoh le phachomjo ahi ti’neiho le eiho ikilhemchavaile kit un ahi. Smart city min a gam pehdohdi anagut uva jong hitia hi anakisei ahi, ahinla tunichan in government in aladehpoi. Alahnom lheh vang a amoh lahtheilou jeh a alahlou ahi. Igam le ichondan chungchanga ithaneinau (land and cultural rights) kihet jing a idinpi jing diu apoimo lheh in ahi.

Akisei dangkit khat chu ahile government ipehdohlou ule sopi Anal le Lamkang/Muyon hon akinunglah diu hungchenglut diu ahi hijeh chun Manipur government kom a ikijohdoh uva aman a sum imu ule phachomjo ahi atikit uve. Smart city chung ah jong hitihin anakisei in ahinla tun Haolenphai aumjing nalai e. Iti ham in isopi hou chang ngel jong le isopilou Meilhei ho chan sang a phajo nalai ding ahi. Gam thu a court case kibol hi Haolenphai bou hilouva mun dang jong ahi’n achaina gei a thutanna aum tokah a agam toupha pa pa a ahijeng e. Among a court case chu appeal le repeal kilhamat chat thei ahi. Tua gam johdohthei sahna a thu kisei hohi lunggel pilhing theilou ho thusei tobang hilou ham? Min ichu u jong leh keiho gam ahi tia pankhom tah sang a johdoh ding lang joh a gunchu tah a kipeile ilah uva aum hi nampi dia vangset umtah hilou ham? Kuki kiti nammin a gam le go le nampi ijoh laichan uva Kuki a kihoulna le kinepna lhasuh cheh cheh ding ahi ajehchu mite munem le noise kichang cheh cheh ding ahi.

Seibethei khat chu 1990s lai a Naga-Kuki nam teni kah a kihetkhelna jeh in eimiten gam tamtah le gam lentah imansah uvin tunigei in nunglo louvin aum in, akijohdoh jong aum in akijohdohlou jong hiti chun atoupha pha te gam dan in aumtan ahi. Haolenphai hi kiboina jeh a achengmasa te hon anadalhah uva khonung a dan dihtah a (sale deed) kinei gam khat ahi. Hiche kho hi thisan kilhehtona a kilamdoh tithei ahi’n, kho hung kisemtil a pat tunigei a ahuhhon nampi min a kihuh ahin nampi gou manlutah khat ahi – organisation khat tou property ahipoi – tia nampi interest a ihuhbit jing diu ahi. Koitobang organisation khat tou in keiho anahuhtup kho le gam ahi atiu jong le namdang kom a johdoh ding hilouva nampi min le nampia dia anahuhtup u ahijeh a tu le khonung a jong nampi min le nampi a dia ahuhtup jing diu joh ahi. Atundohna a pan ilahna isopi inammi khosahna kho khat chu kholhingset ahijou nunga isuhmang a agamleiset changei galmia imu u namdangte koma ijohdoh le itundohlo hitading ham?. Haolenphai gam johdoh di anakisei masang in anachengmasa phat khat laia Kuki a anaum ten anachulam jong akihekhapoi. Meilhei te koma johdoh ding thu ahunggin a pat court a gam kichuna hung umdan in aum e. Eihon ikichintup jing ule tribal interest a kihetthemna umthei nantin, achutilouva Meilheite khut a ipehdoh ule tribal ho kikah a kihetkhelna thahbeh nam boina hung umdoh nabep a pang thei ahi nalai e.

Manipur government in thinglhanggam lahthei nading New Land Use Policy lthinglhanggam a chesah ding tohgon ananei alosam nung a thinglhanggam lahthei nadia Manipur State Assembly in 31st August 2015 nia pass abol bill thum, tichu (i) The Protection of Manipur People Bill, 2015, (ii) The Manipur Land Revenue and Land Reforms (Seventh Amendment) Bill, 2015 chule (iii) The Manipur Shops and Establishments (Second Amendment) Bill, 2015 ho jeh a tribal te kiphinna sangtah a auma martyr mi 9 thilong tunigei a vuidoh a aumthei nailou laitah a assembly a pass jong ngailouva thinglhang gambeh lentah hijong chu namdangte kikholdim nading le athaneinadiu township khat semdoh nadia agamnei haosapu le nampi/mipi hetlouva kipedohgu jing hi gamjoh ho iti thiem kichan ahidiu vem? Akisei bill thum ho tilouva jong tutua che The Manipur Land Revenue and Land Reforms (MLR & LR) Act, 1960 noia jong hi namdang ten tribal gam mun phabep hoa inmun akichothei uva cheng thei u ahi. Hiche jeh a Moreh le Churachandpur le Sadar Hills mun phabep hoa hi thinglhangmi hilou ho jong tamtah achennau mun um ahi. Hiche jong hi itile khel diham tijoh ngaito ngai nalai ahi.

Phaichamgam a Meilhei ten Inner Line Permit (ILP) chesah nadia phat sottah nasatah a kiphinna ahin nei uva achaina a ILP hitalouva akilopi thim thinglhanggam jong lahthei nading bill thum ho dan a achesah gut uhi ipi isitpiu va assembly a bill pass jong ngailouva beithalet a gam ijohdoh kigut jeng thei u ahidem ajohdoh go hon nampi le mipi masanga hilchetna le donbutna apeh u ngai ahi.

Phaichammi ten thainglhanggam hi aduchat jing uva itih le kavallhumdem tia agomkom avet jing u ahi. Hiche jeh a chu government in land laws chung chon a jong development min a gam lahpehding atijing u ahi. Thinglhanggam lahtheina ding legislation (dan) jatchom chom apohdoh gut jing u ahin, atinding chu eiho kin ahi. Ahinla, vangset umpen tahchu gamducha hon igam u lahpeh ding go jing ujong le atingding eiho lah a mi bangkah in ibola changphatchomna ding gelna a apedoh ding joh langa ikipeh uham ti hi ahi. Tun jong Sadar Hills lang a adeh a Saitu A/C hi critical condition a umjing ahi ajeh chu administrative reasons in Langol area panna a thinglhanggam lentah phaicham district le police jurisdiction noi in akiumsah in ahi. Thinglhangmi lah a jong eihohi soft target a imu jing u ahi ti akicheh e.

Moreh hi amasan small town in ahung kiheidoh in thinglhangmi hilou Meitei/Pangal le namdang dang hon inmun ahin kichoh thei uvin ahung chenglut tao vin ahi. Tuhin atamcheh cheh uvin athaneinao jong asang cheh cheh tan, agamnei eimite doudalna in kiphinna ho jong ahin neithei taovin ahi. Amaho panpi ding le hutup ding in counter-insurgency operation min in police commando ho ahung kisollut kit tan ahi. Kum ijat hamkhat masanga government in Moreh a commando ho anasollut gut chun mipi in adeiloujeh un anating uvin thu jong anasousang e, ahinla koidang hilou HTC ho mama in lha 3 bouva ding in analutsah uvin ahinla kum ijat hamkhat achetan nungsoldoh nading thu aging tapon ahi. Ukhrul a police commando akisollut a agam mipi in chomkhat jong umsah thei louva anung soldoh utoh chun kikheval hilou ham?

Integrated Check Post sahding phat lai chun namdang ho chenna lah a umsah a achengho eviction kibolding sang chun compensation sum deichat man in eimiho chenna lah joh ah ana kikoisah in tun eimite inmun tamtah government khut ah imansah tao vin ahi. Namdang ho chenna lah a ana kiumsah hile namdang ho tamtah in Moreh anadalhah diu ahitai. Tun jong Lokchao Wildlife Santuary kehlet ding ti government in achepi kit in hiche hi eimite hi gamnei (land owners) ihinao suhmang ding chenna ding le kivahnading helou a umsah ding tina ahi. Hiche thu jong hi iti pan ilah uva idoudal diu ham ngaitoa kul ahi.

Moreh hi 42/Tengnoupal assembly constituency sunga dia town lenpen ahita’n hiche mun hi election kaidoh nadia deciding factor ahi, ahinla eimi ho kaidoh nading hahsatah dan in aumtan ahi. Tun akom ah government ahiloule midang thaneina township thah hung umle jatdang namdang mitamtah hung chenglut be diu eimi MLA khat neidohna ding chance chu mang a jong matphahlou hung hiding ahitai. Hitobanga chu Chandel district a Autonomous District Council dinmun jong hung umding ahi. Ahethemlou hon hethem tahih jong le hitobang thil hethem nam lamkai kahi tiho le MLA le MDC election a lunglut le tutua jong MDC hihon itidan a namdangte kikholdim nading le thaneina ding city ahiloule town thah semdoh ding ahiti boipi hitao vintem tihi igelle Haolenphai johdoh teidi kiti hi ginmo hijing multi-crore rupee land scam ahikiu hilouva agamkei (Chandel district) ah hin aitih chan in eimi ho MLA nungkaidoh dahen lang, eimite thaneina kisubei hen lang hiche sang chun apet pet a sum mua changphatchomna ding le nopsah nading joh kichangle atiu hinte tia gingmo ho dia jong ginmo liu nathei ahimong doh tan ahi.

Gamjoh ho kom a thudoh le thumop nom chule mipi in ahetjing dinga deisah chu Imphal a smart city tundoh nadia iti dan a government in gam athumlam kihekhalou, lah jong alahlou beh hintem tihi geldohjing angai e. Tun jong aumsa Moreh town khu government in asemhoi nom le sem hoi hen, Haolenphai a market ham hospital ham angaikhoh mong mong le jong akisahnading kah bou gam leiset lease agreement neithei ahi (gam johdohna hilouding, government in phattep sung a asan man (rent) apeh ding)), ahinla township thahbeh khat semdoh nading gam alah ngai poi tihi ahi. Hospital, school chule community facilities dang dang sahnading ahi tin akisei e, ahinla geldi khat chu Moreh a aumsa hospital, shool le adang dang ho khu ipi kilogo ham. Phat khat le agam a eiho ihung tamchen chehcheh teng ule achamlou vin town hung hin tin school, hospital le adangdang ho jong chu eimahon ihin kisah diu ahi. Itobang project umjong le agammi hina a iphatchompi diu hihen achutiloule umsahlou phajo ahi.

Manipur government in thinglhanggam, adeh a eimite gam, lahthei le lonkhumthei nading lungthim jat jat ahinken jingu toh lhon a Haolenphai gam hi smart city min in ana lakigo uvin, ahinla Haolenphai haosapu le khomite toh gam ngailu cheng kithokhom in ina huhdoh tao ve. Alosam phat in tun International Border Township/Commercial Township ham ipi township min hamkhat in ilahpeh gut uvin nam dia jachat umtah chu thumna aneimasang un eiho lah a mi themkhat joh in ‘nampi’ min mangcha in apedohgo kit nalaiset uve. Hiche jong hi ikin u ahibanga a gam ngailu cheng in itin kit diu ahi. Hiche joule hin ipi min hamkhat a ahin lahgut kit diu ahi. Tuchung a vang hi aphatai gamlahding gut gut datao vin, itihlai hijong le kapukapa’u gam midang namdang khut ah pedoh/johdoh kabol ngaipou ve, itih hijong le bol jong bol pouvinge tia kicheh tah a anungvil kit lou nadiuva thupeh khoutah ineikhum u angai tai.

Miten gam ichu u bou ahipon politically, culturally, economically le socially a suhnem a iumjing uhi geldoh jing a suhdih angai in ahi. Hiche ho sudih dinga dansem (lawmaker) elected representative isol jiu ahi. Ahinla isolji hou atamjo hin akisollona jeh donpha talou vin amaho changphatchom nading le maipha kiholna in amangji tao vin ahi. Tekah in Meitei Mayek subject hi school ho ah compulsory akihisah in tribal chapang ho hin nikhokhat le ama pao, chondan le kihetna (identity) akimansah uva achung uva identity crisis alhun nading lampi adopeh u ahitai. Thinglhanggam a development fund ho ahiding bang in alhunnading alhung tapoi, government job recruitment ho a trbal quota alhing in akichesah poi. Phatkhat lai a “haomi” tia einakou u Meilhei hon igam ule ichanvou hou lahthei nadin scheduled tribe (ST) status hatah in adel uvin ahi. Hiche ST status demand hi ahung lolhin khah le chomloukah a vallhum a ium diu ahi.

Tribal ho douna le suhnemcheh nading dan umho le tua anti-tribal bill 3 ho hihenlang kahlah a tribal ho dia gamnathei policy chomchom ho hijong le hitobang thu ho ah hin ilhendoh u MLA hou ima seipohlou vin aumji tao vin ahi. MP, MLA le MDC hohi “dansem” (lawmaker/legislator) a akilhendoh lam u ahetlou u bang in kahlah a development scheme ho bou aboipi jiu vin ahi. Mipin jong hitobangma chun apipen a eihodia phachom le ihubit diu dan (law and legislation) ho sem dia ilhendoh u ahilam helou bang in chini, bongnoi, sum jakhat jani, chule development scheme neocha cha muna ding bep a ikilhendoh u dan in ilunglhaipi jiu vin atohdiu kin lenpen idiuva phachomdi dan kisemna dia apanmun u ihephaji pou vin ahi. Anti-tribal bill 3 ho chu ipi ham jong kahepoi, khuche khache in soi kai in ahiloule phatsah in atia le kakai/kaphatsah jeng ahi tia kilepthei bep ahiloule kahenai ahinla thinglhanmite dia ima asetna aumlou jeh a kaphatsah ahi tia pangteitei nalai representative MLA le MP inei uhi vangset umtah ahi.

Chutahle, igamsunga kivaipohna tum del gam le nam a dia kipedoh kiloikhomna hon ageldiuva dei umtahkhat chu ichandiuva lom political autonomy/enitity ahiloule right to self-determination ikipehlou jeh uva igamsung uva chamna le khantouna (peace and development) ahiding bang a aumthei lou hi pansahna a nei a lasting solution khat umdoh nadia government nokhum ahiloule pressure peh angai e. Abolpouve tina hilou vin Haolenphai thua eiho noplouna a gam ikilahpeh bebe kigut jing u jong hi pansatna thei khat ahi tina joh ahi. Vannoi gamtin a sopi kiholthu thua ikoma umsa ipaotho le ichondan kibahpi/kilopi toh kitohtheilou va gam ijoh joh jeng le ipi gam le nam politics kibolna ham hetthem hahsa ding mong ahi.

Khaile, hijeh chun achesa phat geldoh pum in tu le khonung a ichateu ituteu khankho ding ngaitona in ipu ipa teu vin aitih a ikichintup jing diu le ihinpi diuva inadalhah peh u gam le nam khankho huhbitna in pan lakhom kit taote. Haolenphai le Smart City thu chu eiho galjona in akichai tai, tun International Border Township thu in ihin phakit taove. Aban le ipi hiding ham seithei ahinaipoi. Haolenphai a ilhuh ule inam pumpi lhuding, idindet ule inam pumpi aitih a dingjou ding tichangei dinmun a um ihiuve. Hijeh chun ipi dinmun hijongle kimaitopi ding a kigotna nei pumin dingdet jing ute. Ilhasotah u gam ho inungchan kit thei kah uva tua ikhut uva umsun nampi gam le gou ho beh hi chingtup jing pum in tanglou vin iboinahou hi permanent solution holdoh in pan lakhom utin malam notao hite.

Pathen in phatthei iboh taohen.

Thujihpa Jalun Haokip hi 2010 kum a Flinders University, Adelaide, Australia a Master of Social Work (MSW) anaichai jouva South Australia government noi a social worker hina a kum thumle keh anatoh jouva tutua hi Western Australia government noi a social worker hinamama a kum 2 lhingdih ahintoh jom jing ahi. Hiche atohsunga phat atamjoa Indigenous Australian mite lah a anatoh ahi. Koitobang akijahmatpi nom hon a email jalunhaokip@gmail.com a hi kijahmatpi thei ahi.