Anti-tribal bill 3; martyr 9 ho vuidohkin a ipi phachom diham? Vuidoh tadilouva vang aphachomthei ding aum e.
By: Jalun Haokip (MSW) Social Worker, Western Australia.

August 31, 2015 a Manipur Assembly a pass anakibol bill thum ho, 3 anti-tribal bills tia kihe deilouna in Manipur thinglhangmiten kiphinna nasatah inanei uvin Churachandpur a kiphinna anaumna ah pasal hangsan 9 in gamhuhna in thina anatoh tai. Hiche chun tribal mite, adeh a eiho sung ah, kipunkhomna khat ahin umdoh sah in tribal mite a dia thudih thumna in kiphinna anasan sah cheh tan ahi.

Bill 3 ho hi Manipur Assembly in pass aboljouvin Manipur Governor ah anachen ahi. Governor pan phatsahna apehngam tahlou jeh chun Centre ah President heng ah anasolkit tan ahi. Chomkhat jouvin Governor pa chu vangset umtah in lungkhambeh jeh hidia ginmo jeh in hetmanlou natna in anathitan ahi.

Kiphinna asan jeh chun President in phatsahna soi kailou vin stakeholders jouse phatsahna ahi ngai e ti written assurance Centre a kon in ahung tan ahi. Hiti chun tuchan in hiche bill 3 hohi pending in aum in ahi.
Joint Action Committee (JAC) in a demand pen chu ahile bill 3 hohi withdraw (nung lahdoh) ahiloule tribal ho douna thucheng ho lahdoh hihen ti chu ahi'n tunigei in hichu aumnaipon ahi.

Hiche bill 3 ho thua a kiphinna khohset laitah chun Suspension of Operation (SoO) signatory group teni Kuki National Organisation (KNO) le United People's Front (UPF) in jong pohnatna ananei uvin tribal MLA ho ki resign diu changei deadlide anapeu vin, JAC in jong Indian Govt in UPF le KNO toh political dialogue le settlement aneinadi changei in memorandum anapeh uvah chun anapantha sah un ahi. Manipur Govt in ichangeiham a control abol u hitajong le hahsatah in anakitahsang in namsung ah kinepna thahbeh khat anapendoh sah kit tan ahi.

Ahinla, phat ahungchechen deadline ho ahungval tan ahi. Manipur a tribal MLA agom a 20 ho lah a NPF MLA 4 (amaho vang ahile Naga ho pressure jeh a ki resign) tailou khatcha ana ki resign talou, bill 3 hola withdraw ahiloujongle semphat hidehtalou, MLA hon la bill 3 in tribal interest imacha atongkhapoi tijing nalai u - shall extend to the whole state of Manipur kiti le Manipur hi hill state ahi kiti meaning theilou dan abangtao vin ahi. All Tribal Students' Union, Manipur (ATSUM) in tribal MLA ho social boycott abolkhum jong ichangei a effective hinam kihelou dinmun a umkit ahi.

Ahile, kiphinna la atangdeh pon Manipur Govt in la adinmun khenemdeh lou - akhehnem le Meilheite kiphin kit ding kichatjeh hitei ding ahi. Hicheva akikhetna chu Meilhei MLA jouse le Ibobi Govt hin Meilhei public/mipi akichatjeh a bill 3 ho hi withdraw ahiloule akhelnomlou u ahi ajeh chu abol ule mipi pressure a resign kiboltei tei diu ahi, ahinla eilang MLA ten bill 3 ho hi imacha asetna aumhih e kitinomsel u, resign kibol diuva public pressure jong ana sangchom dehlou ahi. Bill 3 ho idei uham itile jong hideh kit lou. MLA ho amonau chu kamchengkhat a jong ananielkallou u chu ahi. Manipur Assembly a 40/20 number game jeh a anajoloudiu hijong le ananielkal beh ule lungoi chu umdom ding ahi.

Indian constitution Article 371-C noi a kisem Hill Area Committee bypass (peldoh) kibol chu dih hen lang dih tahih jong le bypass akibolthei le idinmun u hi tijat umtah ahitai ajeh chu tu Manipur a tribal te ahiloule hill area a dia constitutunal safguard kineisun chu article 371-C noi a Hill Area Committee thaneina hi ahi - Haosa system jeh ahideh poi. Hiche hin ihuhbit jou tahlou ule hiche kalval kihuhbitna kiholdoh a chan angaitan ahi. Hiche thu hi 2015 August a ATSUM hon bill 3 chungchang a tribal MLA ho Imphal munkhat a anakou uva meeting ananeipinao va chu keiman jong kanasei ahi.

Hiche ATSUM meeting a hung pang tribal MLA khatchan kabolkhel tai tilou in thilkhat ahiloule thildang jeh khat in thiem akichan nalai uvin ahi. Ahung MLA ho lah a senior pen le cabinet minister jong hi khat chun pontho tah in lekha toh ipipi toh hilchetna ananeigo jing in ahinla student ho chu alungkimpoi. MLA khat (Thadou speaking sung a politician lah a dia Congress member senior pen a kisei) chun ahile imaloutheh dan in eiho tribal/thinglhangmi ten gam lentah inei un mi ilhom uvin, phaichammite mi atam un agam u aneo in hijeh a chu amaho ding jong igelpeh u angai e anati nalaiset in ahi. Tribal mite lhahsamna jeh le ipi dinga gam le go thupi dehset ham ti ahetphahlou ahiding tahsan aum e. Ama chun tribal mite chu chomkhat salet lut in hibangsen kiphin untin ijole thipdoh taovinte tin CM Ibobi kaseipeh e anati in ahi. Adhihna jong aum in imutaove, adeh a Thadou speaking group ho lah ah.

Ahile, mipi in Manipur Govt chung a lunglhailouna sangtah aneijing lai in political demand nei cheh SoO group teni joh in 9 February 2016 nikho a kihouna a mithilong 9 ho vuidoh ding ahi tin thutanna ahinnei jing tao vin ahile boina sangtah ahungsohdoh kit tai. Meeting video recording a kimu dungjui jin phatkhatlai a kineppitah a anakinei Pu PS Haokip in martyrs 9 ho thilong 13 February le vuidoh ding ahi, ajeh chu ajeh tamtah umlah ah mithilong akivuidohlou le Centre in interlocutor jong kilhengthei lou ding, political talks jong ipattheilou diu ahi atijeh u ahi tin asei e.

Lungdon umtah khat chu mipi joh in bill 3 ho withdraw boldi chungchon a thinglhangmite a dia autonomy chan demand bolta a, ahiche autonomy, statehood hile 'a state within a state' hile itobang autonomy chu hitale, delna a kum 30 lang meipum hinchoi a kiphinna hinnei ho joh in mithi vuidoh ding akivuidoh joule kihouna kipanding ahi ati laitah hi ahi. A bill 3 thu jong kisulham nailou a chu iti mithiho kivuidoh jeng diham tiho panna agihjo tan ahi.

Vuidohdihe tiho joh hin political dialogue akipat a kamiteu deidung juija ka political demand u suhbulhit nalam amano tokah gei a mipi toh pangkhom a mithi kivuidoh louding ahi tijoh in pang ule kilomtah ahi. Chuche hilou in akilebul khatan ahile mipi alungdong gam in vangset um akisalheh tan ahi. Moh semthu bolthu thei hilou hibang a political bargaining tool hoitah khat (vangset thu a hijong le) kichang a amanchahji atheipouve tiloi atamtan ahi.

Pu PS Haokip ahoulimna ah chun mithi 9 vuidoh lou khoh asahna jeh lah a chun chapang ho school kai, nitin kimanchahna boi chule adang dang alhangpi a anavahlou dan jong asei in ahi. Ahithounai, ahinla kageldan in hiche hi social development kiloikhomna ho subject ahin revolutionary politics kabol e tiho subject din anemdiu in ahi. I thingnoi lamkaihou hi confused higam u hitam? Political settlement a dia political talks umdi serious tahtah ahiule ibola tu hibang phat kijenpetcha hi political talks umnadia bargaining tool a amanchah uva Govt pressure abollou uham tijoh hi mipi thudoh khat ahi.

Mithi akivuidoh lou jeh a Govt chung a pressure khangjing ahi, hijeh a chu vuidoh nadinga Govt a pat pressure hung um ahi tichu hetjeng thei ahi. Ahidi mong ahi, ahinla amahojoh in mipi toh kitho a Govt pressure apehdiu doltah ahi, achutilou le politcal goal ijat in kisei jong le atahso ding chu hahsa dia min agel ahitai. Vel ijat SoO political dialogue aumloule SoO a kon a kipotding danpolam (out law) a kiumkit ding thingnoi a kikilekit ding ahi atiu hitam, ahinla tuchangei in political talks la aumnaipon ipiti am ihesoh uve. SoO jeh a ei le ei kah a kitha kimat aoldom vang kipa umtah ahi, ahinla Manipur govt manchah bep a aumkhah diu vang dei umlou ahikit e.

SoO agreement framework noi a political talks le settlement umding ahile Manipur territorial integrity tongkhalou a hiding ahin separate statehood ki demand ahi kitiji jong hi lungdon umtah khat ahi, ahinla akimujong le aphacheh e kiti kit thou ahi.

Centre a IAS bureaucrat khat instruction a thusei natoh bol bep dan in akilangliu jin ahi. Tutua Outer Manipur MP pa hi Congress candidate hinajeh a kilungtoh tah a anasot u ahin anasondoh taove, ahinla tunigei a khatveibeh parliament a SoO group ho political demand thu kichehtah a aseikhah tah am? Election seh le adeh in "KNO supports Congress" tin thuso akibolkeiji in election tengle jong hiem le thal mangcha in Congress candidate ho kaidoh nading natoh achepijiu vin ahi.

Ahinla, Manipur Congress Govt in Kuki state or autonomy pehdi thu aseikhah tah am? Iheuve ahilou. Manipur CM Ibobi in nisa lhumlam a asotengle bou Kuki state thu kiseidi ahe atibep hilou ham? Serious tah a political level a kihoupi kham jong asahlou u ahi akicheh e - aumdingsa 6th schedule kisen implement abolnomlou ahi tunichan a. 6th schedule pehtah sang a development min le administrative convenience reason a gam ilahpeh jing u ahi - Torbung thusoh, Jiribam, Sadar Hills, Churachandpur le mundang dang atouphau le Haolenphai thu.

Moreh koma Haolenphai gam jong mitmuchang in amasapen in New Moreh Township, aban in Smart City, tua International Border/Model Township aban le ipi ahiding kihelou min a kilep a iguhpehgut jing u TSA makaina in gamngailu cheng in akidaltan nung a eihosung joh a ipipi khantou le machalna thupi mangcha a Meilheite pedoh dinga kisalelkei iumkit u toh lungdon umlheh vang ahitai. Election a manchah ding bep a adei u le monetary business bolkhompi dingbep a kideitou ahi tithei liu vin aumdoh jin ahi. State a BJP ahiloule party dang Govt umle jong ichom hilou meithei ahi, ahinla aumnailou jeh in akiseithei poi.

SoO signatory groups hohin 6th schedule hi nem asah ujong le akhohpoi, ahinla 6th schedule demand thu ah kikumdao hen lang oppose vang boldau le hoi din akimui. 6th schedule deilouna jeh a mithi vuidoh ding kiti ahikhah le (ahi e tina vang hilou), akivuidoh jeh a ipi kimuding ham mipi hetnom hiding ahi. 6th schedule demand jeh a amaho political demand atohkhah nading aumpoi, 6th schedule beh chu akimule kibulphu nadia phajo hilou ham ti ngaidan aum in ahi. 6th schedule hi ituppen u vang hilou maithei ahinla hichebeh imudoh uva ipi asetna umam tua sang a gamcheng a gam le nam huhbitna le khantounadia aphatna umjo ding hilouham tihi ahi. 6th schedule noi a hi tribal/hill MLA ho thaneina kisunem ding, Autonomous Council (MDC ho) thaneina kisuhat ding tina ahi'n idiuva thilpha ahi.

Lunggelthem tamtah in agel chu ahile mithiho vuidohlou a umna a ban interlocutor lhenna umlou a political dialogue neipi panding Govt in agutlou le mithi kivuidoh le pressure-free hitadiu serious business, tichu, political dialogue le settlement thu gamla cheh ding ahitai ti chu ahi.
Akibolkhel cheh kit chu 13 February nikho a mithi vuidohdi tia aseisau toh kitohlou in mipi noplouna nasatah jeh in mithi ho vuidoh anahi tapon ahi. Hiche jeh a Govt le vannoi mudinga chu thulahlou akisobep khah diu chu nom kisakit lou, ahialah tudinmun a thilong akivuidoh le sotnemcheh le khohcheh dinmun a iumkit diu kidettheimo cheh ahi. Beilamtah a mipi phatsahlouva hithei jeng ding dan a thivuidoh ding tiho dia hi lose-lose situation hidin akilang e.

Ahinla, seitohmo kihoutohmo aumlou toh lhon in dohlhing a anadohlou u mipi kom a nungche kit a mipi toh pangkhom a doi-le-tup mano chu Govt a kon le vannoi namtin a kona jana channa lentah khat hiding ahi.
Hiche thua hi tribe community khat bou pohgih a ikoilou diu ahi; namdang khat toh jong moh vetbeh peilou ding ahi; hiche bill thum hohi dan a ahungche le ipipi min in tribe certificate kilah in lang ipi nammin in umjong le chun tribal ihijeh uva itohkhahsoh kei diu ahi. Hijeh a chu hiche bill 3 thua hi amaho keiho tia kikhenlouva ibon uva eiho tia ipohgih u ihisah uva adoudalna le hiche kalval a idiuva phachomcheh khat munading changei a kilungtoh diel a pan ilahkhom diu apoimon ahi.

Thulamleng tobang a kisei khat chu ahile hiche bill 3 hi Naga/NSCN (IM) ten chance/advantage alajo e / alago e hijeh a chu vuidoh loi a athu kichaisah ding ahi tiloi ilah uvah aum e. Tribal hina a khat le khat kihetthemto le kijatona a common cause/interest a ipankhomthei ule thilpha ahi. Nagate akitipou pou le kilheplhah abei e tia Haolenphai thu a Naga kiminphah a ikilheplhahgut bang uva hiche bill 3 thua jong hi Naga kiminphah ji khat tou hitam lungdon umdoh liuji ahi. Hetchen louva tijat kichatman a mithi imoh vuidoh gut jeng uham? Hiche dinmun chu ahile ibola tribal cheh hijong leu hen Naga ten bon advantage alahthei ule imi isa thina thu chu eiho joh in advantage/phatchomna ilahthei lou diuva kigel ihiu vam? I politics bol u hi hichangei a nemsuh khat hitam?

Kaseibe nom chu ahile Naga ten eiho kiphin chance alathei e itiu ahile, hetdi khat chu eihon jong Naga te kiphin chance ilahthei mama u ahi. Naga ten kum 60 val kiphinna sangtah ahinnei tao vin tun Indian prime minister level in kihouna anei uvin achaina kihoutelna umthei nadin framework agreement aneitaovin kihou achelhajom jing in ahi. Eiho jong Meilheite thaneina Manipur government kivaipohna chung a lunglhai lou a kiphinjing chu ihiu vin, achutile ibola chutobangma a midangkhat kiphinna chu eiho boina suhlhap nadia iphatchompi thei lou uham? Min eiho kiphinna phatchompi khah inte tia kiphinna ngahdi tivang hi ei le ei imacha a kigel tahlou jeh ham ahiloule min ilhepngol u anahikhahlou le imuphah u nem jeh ham ahiloujongle thudih thutah seidohding ikambinna asungthu um hitam tihi gelthei khopset ahi.

LONG LIVE MANIPUR! LONG LIVE MANIPUR! ti isap sap uva Meilheiten 6th schedule tahbah jong ipehnom lou u, chuche malah gam ilahpehpeh jing u; chuche jong sitnalaidan a amaho kom joh a igam u joh lele iumjing utoh, anoi uva ikunkun jeng ule ipi phachom mong nam kikholphau te.

Hiche bill 3 thua hi SoO signatory group ho akikum a thil aphatsang a aset cheh joh dile JAC - civil organization - bou in mipi toh kitho a aboipi jom ding hung phapen meithei ahi.

Ipichu hile i martyrs hou thilo umsah tei nadia pan lahcheh a, amaho thi hin namsunga kilungtona, phatna le bitna, kingailutna chule ingaichat soh u autonomy muna hinsodoh tahen. Robinhood hinkho sang a eiho martyr mi 9 ho hinkho manlhom jo ahipoi.

Pathen in iumpiu vin tin phatthei iboh tao hen. Kakipah e.