Phung ngailutna sang cheh cheh, Kuki neo cheh cheh. Nampi min ipi hidi tam?

-Jalun Haokip

Kuki hinukhah pen le tuchan a Kuki dalha nomlou le hijing nalai Thadou te (Thadou pao tho ho) lah a phung ngailutna asang cheh cheh in, political cheh cheh phung kiloikhomna ho jong akidom sang cheh cheh in ahi. Alangkhat ah midang jousen adalhah nung in jong Kuki iksuhneo cheh cheh un tun tribe khat isodoh tau ve.

24 October 2016 nikho a T Pamei, Commissioner, Tribal Affairs and Hills Department, Government of Manipur in Any Kuki Tribes (AKT) thu a circular khat (No.17/2/2003-TD) asodoh ah chun Manipur a recognised tribes 34 lah a AKT hi tribe khat ahi ati. Sl. No. 33 na a AKT tia kisun hi anung ama a phungmin hile ipi hileh imacha panglou ding “Kuki Tribe” ti bouseh a jih hiding, hibanga chu tribe dang dang ho jong Gazette a kijih dungjui chet a (tekah a ‘Thadou Tribe’ tia) sut ding ahi, tin DC/ADC/SDO/SDC ho Government in thupeh khoutah aneitan ahi.

Mi lhepchatveina a AKT bol hon anasei u phungmin khat pou toh Kuki jihkop a, tekah a Lunkim-Kuki, Haokip-Kuki tia, tribe certificate nakilah thei u ahi tin mipi anajoulhep uvin hiti chun mitamtah in anatahsan uvin ahi.

Hiche hi adihlou dan AKT umdan dihtah hethem hon anasei jing un ahi. Ahinla, aitih a pat inakihetjing nau, 1956 kum a pat tunigei a Indian Government in jong recognise eibolnau, Thadou tribe thu hetna lhahsam jeh ham engkhan man ham chun phungmin khat le Kuki akisuhto pou le tribe khat kiso jeng hisah in aumlou tribe anakilah tau vin ahi. Ahinla, AKT min a aumlou tribe certificate kipeh thu government in ahin khohsah phat a tua hi Gazette dungjui chet bouva tribe certificate peh ding ti ahitai.

AKT min a tu masang a fake tribe certificate anakilah ho chung a gotna, adeh a tribal quota a natoh mu ho anatoh u nung lahpehna, umthei hijong le akilahho le apeho gotna akipeh lou ding kinep aum e, achutiloule Thadou pao tho (Thadou ti ding khel a Thadou-Kuki tia aumlou tribe ana kisutji ho panna a) ho atohkhah ding ahi.

Masanga H Deleep Singh, Secretary, Education (S) Department, Government of Manipur min a kiso “SECRET” kiti Office Memorandum khat a Kuki Tribal dialect umtheina ding thu a Manipur a Kuki population agom a 28,306 ahin Kuki villages agom a 55 chule Kuki schools jat 55 ahi tia Kuki kiti chu tribe neocha khat ahitah dan anaseisa ahitai. Hiche hi akijakhalou Kuki Literature Society, Manipur a Chairman in ngehna ananei dung juija anakibol ahi.

Kuki political movement suhnohphah nadia Manipur a AKT hi 2003 kum a chu duha thutah puma hung kiboldoh hidin jong ginmo aum in ahi.

India leh Myanmar (Burma) Government tenin jong pao le chondan thakhat nei Thadou tribe hi agammi (native people) hina hetpehna lhingsel anei Thadou tribe thu chomchan veu hite.

1912 kum a ana kisodoh John Shakespear sut lekhabu ‘The Lushei-Kuki Clans’ page 191 na le lekhabu dang a jong kisei Pu Thalhun (Elmun, Kipgen leh Haokip penna-pa), Pu Chongloi leh Pu Hangsing penna-pa Thadou (Sehtha chapa) kiti khu Thadou tribe kiseina ahipoi.

Indian Government in Thadou tribe officially a recognise anabol kum 1956 joupeh a Thadou hindem pan ho boina pului Thadou (Sehtha chapa) pen masangpeh a nam (tribe) le pao (language) min Thadou hi ikihetnau min anahipeh ahitai. Akisei pului Thadou hi Chin Hills a Thadou te hunglhun jousang peh 15th Century sung a anapeng ahidan Dr Khup Thang sut ‘Thado Chronicle’ page 122 na-ah jong kichentah in akimun ahi.

Dr Khup Thang sut mama ‘Thado Hungkondohna’ page 12 na a kimu dung juijin akisei Sehtha chapa Thadou pen masangpeh 1230-1400 AD vella Chin Hills a Thadou te kho ho anaum ahitai, chutah le amaho chu phung le chang thu umlou va Thadou mite tia anakikou peh u ahitai.

Chin nammi ho lah a pao chom chom ho hung pendohna Thadou pao kiti hi hetphahlou khang a pat anaumpeh ahitai tin Chin Hills Commissioners BS Carey le HN Tuck in anasut lhon 1896 kum a kisodoh lekhabu ‘The Chin Hills’ ah jong akimui.

Dr Ngamkhohao Haokip sut ‘The Thadou Tribe: Searching For Unity and Progress’ a Philip Thanglienmang in a doctoral thesis ‘An Outline of the Evolution of Dialects and Languages Among the Kuki-Chin-Mizo or Zo Group of People’ kiti ah chun Thadou pao hi Burma a Chin-Kuki Linguistic group (pao ho) lah a 1400 AD a hung kilangdoh masapen pao ahi ati, ati. Kum 600 val masang a ana kilangdoh ahitah le hiche phat (1400 AD) masangpeh a pat ipao uhi Thadou anakiti ahitai ti aphotchen ahi.

Ahinla, kum asang-asang a lui le BC phat lai a pat loupitah thusim nei Thadou tribe thu hethem lou, het ding jong nomlou, ipi jeh tah a Thadou adeilou uham jong kihelou hon BC phatlai a Burma a Thadou lengpa minluto a anakiminsah ahi kiti pului khat min toh anakibah khah jeh bouva pansa a dihloutah a Thadou dem inaumkhah uva kona hichangei pannabei boina aum hi akoikoi a dia vangset umtah ahi.

Thadou tribe hi 2003 AKT um masangin akiseiboi khabeh poi. Thadou tribe phuhlhuh nadin phung politics ihin bol un, Thadou tribe la lhudehlou, ahinla aphung aphung a kitomona le kitetna asangbep tai. Khochen inchen jeng jong malaija lungmong tah a chengkhom te chu tun mikho a phung chaga, phung sangga danin lungmong mon ium tauve. Thadou tribe mudana agaso hi vangsetna le manthahna jeng ahitai.

Phung hi ahidingdol a khankho le custom bolna a akinei le asetna aum poi, ahinla politics bolna a akalval a kimang a leh boi ahi. Phungmi jouse paotho/tribe kibah tei nading thu le dan umlou ahi; ihetthemlou ule boinalou ding beh a iboi jing diu ahitai.

Namdang ten khantou-machalna le gam le nam kihuhtupna ding politics abol jinglai uva eiho phung politics a ingolden uva nampi lamkai a anakihe bangkah jong phung missionary tobang a kitomona punbe nathei phungthu public a thupitah a sei jong aumtah hi vangset umtah ahi. Thadou ka tribe, Kuki ka nation (Nampi) tia kiseiji jong chu achesa thusim bou hung hiding ahitai. Boina sulhap nadia hi masang a banga Nampi (Kuki), Tribe (Thadou) le Phung (clan) umdidol ihetthem soh u angai in ahi.

Kuki min a political movement/demand kibol ho vang tribe khat in amuthei thil ahilou jeh in AKT (Kuki tribe) suhmang a Kuki Nampi semdoh kit diham ahilouleh Kuki tribe panna a Thadou le Unao tribes jouse kigopkhomna minchom khat noi a umkhom diham ti hi ageisang val masanga ngaito khom angai tan ahi.