PROBLEM-FOCUSED HILOU VIN SOLUTION-FOCUSED JOH HI'U TE.



TRIBE MIN THUA BOINA SUHLHAP NADING; PROBLEM-FOCUSED HILOU VIN SOLUTION-FOCUSED JOH HI'U TE. - (THADOU TRIBE MIN THUA RECONS THULHANGSAP HILCHETNA) - Jalun Haokip (MSW), Social Worker, Western Australia. Email: jalunhaokip@gmail.com (Written in March 2016)

Boina, adeh a relationship boina, thua solution umthei nadia theory apply kihabolpen khat chu solution-focused therapy ahi. Hiche theory in aseipipen chu ahile boina dinmun jouse ah hin aphatkah jong aum e ti ahi. Mihem khat in thilkhat chungchang a boina atoteng ipi jeh a boi ham ti akihetdoh jou teng le aboina sang a aphatna/aphatkah phat joh aki focus le solution aumtheijo e ti ahi. Hiche evidence-based therapy/theory hi human relationship professionals (tekah a - social workers, counsellors, therapists) hon interpersonal/relationship issue hoa amanchah u khat hijong le community issue a jong manchahthei tah ahi. - Tekah in nupa khat ahilouleh insung khat a mi ni chun akinah jeh hon in boina suhlhap nading ngaichatna nei pum a kithopina ahung thum a ahile, therapist/counsellor chun aboina hetpeh kom le empathise (mikhat dinmun a ama kikoi theina) bol pum a miracle question, tekah a, "nakinahlhon lou pet umkha am? Ipi ati le nakinahlhon lou ham?" tia adoh le nupa ahilouleh insungkhat a chengkhom mi ni chu itobang in kina jong le akinahloupet ahilouleh akitopet lhon jong umtei ding ahi'n, hichu ahin geldoh diu ahin seidiu ahi. Hiche positive situation focus joh a chu boina chu suhlhap ding a akithopi ji ahi. Hiche hi deficits perspective sang a strengths perspective joh a natohna jong ahi. - 1956 kum a chu Indian Government in hetphahlou khang (since time immemorial) aitih a pat anaumsa le ikihetjingnau Thadou tribe a chu Thadou tia anakihe jouse chu chulai phat a pute pate ho kiphatsahna a recognise inabol u ahitai.

Burma a ahile 1956 masangpeh a Burmese Government in recognise anabolsa ahitai. Thil umsa khat chu recognise kibolthei bou ahin, aumnailou chu recognise kiboltheilou ahi – khang tamtah le kum aja asang a sim history hin nei Thadou tribe dem ho le Thadou/Thadou tribe hi 1956 a umpan dana seiho khu thu le la chule thil umdan ahetlou jeh u/ahetthem theilou jeh u ahipen e. Nilkalthei hilou historical facts ho hi jabol jep ngai ahi. Thu kiti chu abul a kisuut pan a aleh a khumkhana kibolji ahi. Abul abal umlouva ginchat mana thu kimoh sei mai mai ho vang history kiti theilou ahi. - Alhangpia seidia paokhat chondankhat neikhom Thadou kiti ho, Indian Government in jong Thadou tribe a recognised abol ho, chu (1) Guite (2) Doungel (3) Sitlhou (4) Singsit/Singson (5) Kipgen (6) Haokip (7) Chongloi (8) Hangshing (9) Lamhao/Touthang (10) Lotjem (11) Haolai (12) Tuboi (13) Sa’um (14) Khuolhou (15) Lupho (16) Lupheng (17) Misao (18) Mate (19) Baite (20) Lhungdim (21) Ngailut (22) Kiloung (23) Insun (24) Jongbe (25) Lunkim (26) Lienthang (27) Thangngew (28) Changsan (29) Lhang’um (30) Khuongthang (31) Lhanghal/Hanghal ahiu ve.

Hiche list hi Thadou tia kihe pao khat chondan thakhat tho principal clans ho kiseina ahi’n, angahna ahidehpoi. Upat naopat dungjuija kipe ahipo’n, pendol le khanggui thua kisei jong ahipoi. - Burma a Pu Dr Khupthang Chongloi lekhasutna ah Thadou tribe hi Before Christ (BC) khanglai a record anaum ahitai ati’n, India a Pu Dr Ngamkhohao Haokip in jong Thadou tribe hi 13th century lai a record kimupan ahitai ati’n ahi.Amani chungchon a Thadou history sun adang dang in jong amani sut toh kitoh in asuutdoh uvin ahi. Thu khat chu akisut le athu um masa ahibanga thil khat record um kiti chu record kibol masang a athil anaumsa tina ahi. - Koitobang khat chun BC akitile tahsanglou jeng, chulai khanga Thadou nam anaumtah a ahile itidan a population hijat bou ihi diu ham atimaithei ahi. Ahinla gelding chu BC kiti kipatna chu kum sangni bep che nalai ahin chulai a nam khat anaumtah ding chu ahimo nading thu aumpon ahi – thilkhat chu khoulgilna chomchom (research kibol) a pat a hung kitoh chu hinte tia kibola hichu ahia kilaji thou ahi. History ivetle natna, pul, gal, namdang lah a mang ham ipipi jeh hama population khesuh ahiloluleh nam mangthah jeng jong um kit ahi. Australia a Aboriginal mite jeng jong Britishte hunglut jouva pat kum 150 chan Britishte jeh a a-population u ananemsuh uva tribe chom chom pao jong ijat hamkhat anamangpei ahi. Thadou thu dihtah le lhingset a hetding iti le Thadou history kimumasatna pen Burma a Thadou history het masat angai in ahi. Thadou thu abullang helouva alehlang bouva Thadou thu pan ji hon Thadou thu ahetlhing hih uva le lungboina anei u ahi ti akicheh in ahi. - Gahseibe thei khat chu Burma/Myanmar a hi Thadou hi agammi, tichu ethnic/native group of people, lhingset hina a Chin nampi noi a nambah khat a recognised tribe khat ahin census a jong separate Ethnic Group Code Number (427: Thado) kipe ahi; Kuki kiti vang Burma gama recognised hilou chule thusim hetkham neilou ahijeh in census ah jong Bangladesh a pat Burma a refugee a anajamlut citizenship le voting rights jong neilou Rohingyas ho toh dinmun kibang a ‘OTHER’ code (code number 914) noi a um ahibou vin ahi. Thadou thusim hi inakhosah masat nau Burma a kipan ahin Kuki kiti kihetna nam min hi ahile Lieut. Col. A. S. Reid in 1893 kum a ajih “Chin-Lushai Land” page 7 na-a kiseidung juija 1777 AD kum a tua Tripura ahiloule Chittagong Hills a hung kipan ahi. Hijeh a chu vacha min Bengali pao va ‘kokil’ (English paova ‘cuckoo’ bird, Thadou paova ‘kakhut’ va kiti) a kona hung kiseidoh a British te’n ‘hill men’ ahilouleh ‘highlander’ tia jong anasei u Kuki kiti hi Burma a hetpeh hilou ahi. Chulaiphat a chu Kuki kiti chu Lushei ho ahilouleh Chittagong hills a thinglhangmi ho anakou nau vin jong akisei in, ahinla Lushai, Zao tia jong amaho le amaho anakikou, hon hiche kiminsahna Kuki chu anasang khapouve ti’n jong akisei e. - Thadou hi kichehtah a paokhat tho namkhat kiseina specific term ahin, Kuki ahile Bengali ahilouleh British ahiloulehten alhangpia hindan chondan kilou thinglhangmi nam miho anaminsahna generic term ahi – hijeh a chu Kuki hi Thadou (tribe khat) dana akibolji hi adihloujeh a hichangei a boilo ahi. - Thadoute migration le settlement jong athusim sao le ahouplet jeh in agam agam a thusim jih hon agam agam a Thadou ho toh kitoh a ajatchom deuva ajihnau jong umding ahi, ahinla thu-masa haimil lou ding ahi, namkhat jatkhat ihinau suhdet jing nadinga. Mizoram a Chawngthu (Pu Chongthu) chilhah ho jong Thadou pao thothei tahih ujong leh Thadou apomjing nahlai u ahi. Hijeh a chu Burma a anapem masa, abana India chule tua Bangladesh kiti gam chana anapemlut/anakithecheh Thadou te thusim akibahna tamtah lah a akibahlouna neocha khat lhendoh a chua pansa a kikhenna ikisemthu uhi vangset umtah ahi. Burma, India le tua Bangladesh a Sylhet a Thadou population jat thu 1912 kum a J Shakespear lekhasut “The Lushei Kuki Clans” page 189 na-ah jong akisei in ahi. - Thadou thu seiboi hohi Thadou ahatmo leh Kuki hatdia ngaito Kuki ngailu dehset dana kiseiho ahi’n, ahinla thutah chu ahile Thadou thu akiseiboi jeh a Kuki jong Thadou sang a boicheh doh ahitai ajeh chu Kuki chu Thadou tribedana kiboldoh ahi. Kuki jong seiboidi iti le Thadou thu sanga seiboinathei hatah a tamjo um ahi, hiche jeh le Kuki mina na kitong dihthei asahlou jeh uva India a Thadou ho tailou Kuki anakiti ho jousen Kuki adalhahtheng gam u ahita’n tua jong Kuki min a Thadou dehna akinei jing le Thadoute jong itihchanpi Kuki a aumnalaidi seitheilou chana um ahi. - Thadou pao kiminphah masatnapen thu: Thadou pao kiminphah masatnapen chu Dr Chongloi in a article “Thado Hungkondohna” asutna page 13 na-ah hiti’n asei in ahi: ““….Chin Hills Commissioners teni BS Carey le HN Tuck in asut lekhabu “Chin Hills” gazetter sunga tua Hakha gama pao ho, Falam gama pao ho, Teddim gama pao ho le Chin Hills sunga pao adangdang hohi Chin Hills lhunjouva hung um ahi ati. Hiche pao ho hung kipatna amudohsoh keijun ahi. Ahinla, Thado pao hi hetphahlou masanglaija pat (since immemoriable time) ana kipan ahi atilhon e. Chule Thadou pao hi Chin minam hon common language a anaman u hiding in ginchat aum e atilhon in ahi. British Empire phat lai a Chin Hills Commissioners teni BS Carey le HN Tuck in asutlhon, “The Chin Hills” vol.1 ah chun hitihin aseilhon in ahi: - “A group of people came to Burma. They did not have a group name, but they called their language Thado (Minam khat Burma ah anahung uve. Amaho chun jat le nam min ananei pouve, ahinla apao u chu Thadou ti’n anakikou uve). After some years they were called Klang Klangs (Kum ijat jouham chun amaho chu Klang Klang ho ti’n ana kikou e).”” - Hiche Klang Klang/Klangklang mite hi Chin minam lah a Thado ho ahi’n Chin minam hung kipatna chu Thadou ahie ti’n jong Dr Chongloi in hilchetna toh tho’n aseibe’n ahi. Chule ama’n Thadou te kitouldan (Thadou migration) aseina ah chun Myanmar gamsunga Thado konna Thet (Proto-Thado) chu BC 600 vella lhung ahitao ve. Chin Hills chu 1230 AD a lhung ahiuve ati. - Dr Ngamkhohao Haokip in alekhasut “The Thadou Tribe: Searching For Unity and Progress” na-ah Philip Thanglienmang in a doctoral thesis “An Outline of the Evolution of Dialects and Languages Among the Kuki-Chin-Mizo or Zo Group of People” kiti ah chun Thadou pao hi Burma a Chin-Kuki Linguistic group (pao ho) lah a 1400 AD a hung kilangdoh masapen pao ahi ati, ati.

1400 AD kum a anakilangdoh ahitah le hiche phat masangpeh a Thadou pao/paomin Thadou chu anaumpan ahitai tina ahi. Chin-Kuki nammi paoho lah a anaum masapen ahitoh lhona hiche Chin-Kuki tribes dangdang ho paoho hi Thadou pao a pat a khonung a hung pengdoh ahi akiti. - Dr Chongloi lekhabu “Thado Hungkondohna” page 12 na a kisei 1230-1400 AD vella Chin Hills a Thado te khosat ho Min le Khomin ho chu: (1) Pu Lunkim – Leijang, (2) Pu Chongloi – Jangnoui (3) Pu Kipgen – Tuhmun (4) Pu Hangsing – Vongjang (5) Pu Sitlhou – Jampi (6) Pu Singson – Khojang (Tedim) (7) Pu Guite – Lamjang (8) Pu Lenthang – Molbem (9) Pu Mate – Toulmu (10) Pu Baite – Tuithang (11) Pu Haokip – Chahsat (Kansao) (12) Pu Sontah – Sijang (13) Pu Doungel – Touljang (14) Pu Changsan – Lhungjang/Tungzaang (15) Pu Lhungdim (Tungdim) – Sinam (16) Pu Touthang – Gamngai (7) Pu Haokip khailhah Pu Mangvung – Phaitu (18) Pu Manlun (Chongloui) – Selcham (19) Pu Lhangum – Moulpi (20) Pu Sehtha – Khutlujang (21) Pu Chongthu/Songthu – Chimnoui/Chimnuai ho ahi. Hiche list hi angahna jong hilou maithei, suhmil le hetlou jong um maithei ahi. Hiche khoho hi Thadou ten Chin Hills a akhosat u amasaloi ahin kum 500 a pat 700 vel sot kho ngenchang ahin’n abang hi tunigeija umnalai le khonunga India/Manipur lang a kho kisem a amin kipustah jong aum in abang vang kinungchen kitna amin kikhel jong aum e ti’n akisei in ahi. - Achunga thu’n avetsah chu Thadou pao ahilouleh Thadou thu hungkipatna asottah dan chu eihon tua Thadou chilhah kahi kahipoi tia ikinahlonau ho pen masangpeh hitante ti ahi. Dr Chongloi in aseimabanga khonungsang peh in Thadou kiti mi 4 lang anaum jong le tribe/collective identity min Thadou hi mi min a pat hung kiladoh ahipoi ti jong avetsah in ahi. Vannoi nammi ho thusim sun a pang pen British lekhasun dang dang hon jong Thadou thu asut ho’u toh ivetkah le aphat le thu hi akitodildelnaaumin ahi. - British kivaihomna noija Chin Hills Commissioner teni BS Carey le HN Tuck in Haokipte chu koiho ham ti hetdohna le hilchetna aneinalhon a chun 1896 kum a anasodohlhon lekhabu “The Chin Hills: A History of the People, Our Dealings with Them, Their Customs and Manners, and a Gazetteer of Their Country” page 4 na-ah “The Chassads belong to the Thado tribe” (Chahsat te chu Thadou tribe ahiu ve) akiti’n ahi. “The Haokips are merely a family of the Thado tribe” (Haokip te chu Thadou tribe sunga family khat mai mai ahiu ve) ti’n jong aseibe in ahi. 1800 AD lai a Suhte gal thu toh kimat a Haokip ho kho khat Mombee (Lonpi atina) thu aseina ah chun kho haosapu “Nulshun Haokip” chu “Thado Chief” atikit in ahi. Hiche Nulshun tia Britishten ajih u hi pu Ngulkhup Haokip, Lonpi haosapu ahi. Amahi 1917 A.D. laija Thadou hon Sapkangte chunga gal ahinbol diu kona Mrs. Cole koma “Keiho Thadou hon coolie na katongji pouve, British hon nagot got u chu kagouve, kibollu hite” tia ana sei ahi. “The Chin Hills” page 17 na a footnote a Nulshun (Ngulkhup) Thado Chief tin akisei kit in ahi. Page 119 na a footnote a khun Nulshun (Ngulkhup) Thadou chief tin akisun kit in ahi. - Thado le Thadou hi thakhat ahi, namkhat kiseina ahi, lungdonpi ding ahipoi. Kuki jong Cuci, Cookie, Kukie, Kookie etc kitina aum in Meitei jong Meithei, Lushai jong Lushei tia record kibolna jong aum in ahi. - Burma independence munading thu toh kimat a Burma a native groups of people/native tribes hon kinoptona soi abolnaokhat ah chun Thadou tribe jong anapang in, Hengjangpa tia jong kihe Pu Onkhomang Haokip le Thangsipa tia jong kihe Pu Letso Haokip in Thadou nam thakhel in soi anabol lhon in hiche hetjingna ding chun sana/dangka chemjam khat cheh jong anachang lhon in ahi. - Achunga hi tekahna a kisei thu ahin Haokip tilou Thadou pao tho phung dang ho jong Thadou tribe ahinao thu le la ahilouleh record umcheh ahi. ‘A Slight Notice of the Grammar of the Thadou or New Kookie Language’, Stewart, R (1857), ‘The Chin Hills : A History of the People, their Customs and Manners, and our Dealings with them and a Gazetteer of their Country, Carey, Bertram S. and H. N. Tuck (1896), ‘Thado Grammar’, Hodson C, Thomas (1905), ‘The Lushei Kuki Clans’, Shakespear, J (1912), Pu Longkhobel Kilong in anajih ‘Thadou Lekhabul’ (1924), Pu Teba Kilong in anajih ‘Thadou Anisuba’ (1926), Pu Ngulhao Thomsong in anajih ‘Lekhabul’ (1927), ‘Notes on the Thadou Kuki’ (1929), akhang akhang a thimthu jaila hung kichingpeh ho le Thadou mite chung chang thu sotlaipeh a pat kijihna lekhabu dang dang a thu umho hin Thadou pao kiti hi tua Thadou pao tho phungho jouse pao le kihetna nam min a kihe masapen ahi ti aphotchen ahi. Ipao ule inam min uhi Thadou anakiti masanga ipi pao ipi nam (tribe) anakisah ham ti record ahilouleh thu aumkhapoi. - Achunga thuho hin Thadou hi aitih a pat a ipao-u min le ihung kihet jingpeh nau minahi ti aphotchet ahi. Hiche thuhi Thadou inakiti masang uva kiminsahna khat anaum inte tia nielkal nom loi um meithei ahi, ahinla thutah chu ahile hitia ajeh le pansatna imacha umlou a moh pongpan mai mai chu kinielnathei le thulahthei (logical/reasonable argument) hilou ahi. - Haokip pao, Haokip ham ahiloule phungmin dang-dang minpan a pao chom dana kiseiji hohi ngolhoui thim chapang lunggel tobang hijong le akahlah le akijajep jin ahile hilchetna gah nei ute. Hitia kiseiji hohi pao chom beh ahipon agamkai dung juija pao le ham kikaidan, agindan ahilouleh thucheng kiminsah chom diu English pao va ‘accent’ ahilouleh ‘slang’ kiti khu ahibou vin, abona pao thakhat Thadou pao ahibou vin ahi.Tekah in Burma a cheng le India a cheng Thadou ho jong apaokaidan u jatchom deu ahi, ahinla Thadou pao cheh cheh ahi, hitobanga chu Chandel district lang a cheng ho le Sadar Hills lang a cheng Thadou ho jong apaodan u/apaogindan jatchom diu ahi, ahinla Thadou pao hithou thou ahi. - English jong pao khat nam khat min ahi; ahinlah agamkai le chenna mun dung juija, tekah a, British English, American English, Australian English etc tia pao kaidan (accent) le eihon kihoulimna pao iti diuham thucheng kiminsah chom chom (slangs) dungjui a kiseiji thu ahin abona English pao (language) ahisoh kei in ahi.

Australia sung jeng ah jong state chom chom ah accent chom chom aum in ahinlah English ahisohkei in ahi. Hitiobanga chu England le USA a English pao thoho lah sung jeng a jong state chom chom, gam chom chom a accent chom jep jep um ahi, ahinla pao thakhat English ahisoh kei in ahi. Pao le chonna (language and culture) hi static, tichu nisa banga kikhellouva aumnamun a umden den jeng, hilouva evolving ham developing ham, tichu kum aja-asang a sim a lut a kikhelthei hijengjong le tua chenna gamkai dung juija ham dan le thucheng kimang kibanglou themkhat le custom neochacha a kikhe jeh ho pouva pao chom chom tho le tribe chom chom hidana kisei a kikhenmo nasasa a kikhentei tei kigot tihohi boltah lou ding ahi. - Vangset umtah in Thadou tribe recognition jou khonungpeh in Thadou tribe seiboi, adeilou ahung uma pan in phat ahungche chen kikhenna ahung pungcheh cheh in Thadou tribe jong Kuki nampi jong nasatah in atongkha ta'n ahi. Thadou tribe khehsuh nading ahilouleh suhmang nading campaign lolhinthei nadin phunggui toh ahung kiseimat in akimatna umlou phunggui thu a pansa a tribe thu a kiniel boutamna ahung umdoh tan hiche hin vangset umtah in inamsung uva isunohphah pen khat u phung a ngolna (clan fanaticism) kitetna aumdoh sah bep in ahi. Thadou namsung a kineppi umtah tah hon nam sunga kilungto nadi le Thadou hatdoh kit nadia akhamkham uva pan nasatah a ahinlah najal uva Thadou tribe machalna mit a muthei a aumjing lai in Thadou nam sung mama a kineppi umtah loikhat (2015 kumlhun lama kiphutdoh) "Reconciliation Forum" (Recons tia kikou-u) kiti hon 'Reconciliation' (kihouchamkitna) thucheng mangcha in Thadou pao thoho lah a kilungkhat kipumkhatna um nading tin ahung kipei uvin pachat jong aum uvin ahi. - Recons thulhangsapna ah hin apha ijat hamkhat umjong le tribe min Thadou thua athulhangsap hohi alhinglel, adihlou ahilouleh mipi lung puikhel theidi thu phabep aum in ahi.

Vangset umtah chu Recons kitiho hin Thadou tribe hi Thadou Inpi le Thadou mipi chepi toh kikal a Thadou tribe hi amin akikhelle boina jouse meibol kitolmang bang a kitolmang jeng dia agelkhelkhah uhi ahi ajeh chu hiche hi boina le kikhentelna punbe cheh nading chule ahitheilou ding thu ahibou vin ahi. Thadou tribe hi seiboi lou ding hijong le seiboitheina point khat kimudoh bouseh a kiphumden sang a aphatna point tamtah ho ah hin kitona ding le solution kiholle hichea chu solution anaumsa ahijeha kitona le boina suhlhap a um jeng thei ahi. - Recons in pao khat chondan khat thoho lah a kitona le kipumkhatna ding ageltah tah ahile Thadou Conclave Delhi 2015 Declarations a anakiphongdohkit bang le achunglang a evidence toh kipehtha a kisei Thadou hi phung le chang ahipoi, pao khat chondan khat tho Thadou tia anakihe/kihejing ho jouse kihetna tribe min a kipom a kichepi ahi ti jong hi asapphong thadiu doltah ahi. Chuti hitalou va phunggui thu a pansa a thuchenghoi khat (Reconciliation thucheng) maitoum a kinei a Thadou tribe douna natohna khat mai mai a aumdoh tah jeh uva chu itobang in seithem kigo jong leu Thadou tribe pom ho'n Recons tohgon le natoh apomlou diu chu hetsa ahikit e. - Ahinla, vangset umpentah chu ahile Recons hin Thadou pao thoho sunga boina hi aboina bou amu uva ipi iti lai uva chu kilungtona le kipumkhatna anaum ham ti chu ahaimil uva boina a ohden kigokit ahitao ve. Hitobang jeh a chu 2003 kum a chu ipi ahi kichehlou "Any Kuki Tribes" (AKT) kiti anaumdoh ahi'n, aphachom poi; alosam deh in aboicheh jobou vin ahi. Tua jong Recons hon reconciliation thucheng maitoum (mask) a neija alosamsa AKT bolsa tobang mama media le mundang dang, Pathen hou in kisen a asapphong jing u Thadou hi phungkhat ahibou ve hijeh a chu Thadou tribe hi amin khel angai e tia pansa Recons movement kibol hi vangset umtah ahi. - Recons lekhabu page 4, 2nd paragraph na a "Eiho akon hilou, India government a kona kikhelna - Thadou tribe recognition..." tia kisei hi Any Kuki Tribes (AKT) in Thadou adehna main point khat ahi. Thadou/Thadou tribe hi original version (Thadou tribe thusim masapenpa) le ipi version tidiham tunaicha a hung kijapan phung khat ahi kitina version aumnai, ahinla Recons hin original version reject abola clan-based version pa akisipchah ahi. Athu chu abanbana isim le Thadou chu imposed identity name chule phung khat ahi tia Thadou dehtheisahna mipi lungthim puiset nading a pansatna dinga kisun/kibol ahi akicheh e.

Thadou ahilouleh Thadou tribe hi India kiti nation umdoh masangpeh a pat anaum ahitan historical records jong phatah in aum e ti reject kibol hi thutah reject kibolna lentah ahi. Thutahlou a kipansa a "hung un kihoutoh ute" kiti vang chu thutah choi hon reject aboldiu achama lha ahikit e. - Kidangtah a Recons in tribe min thua boina suhlhapnading option (lampi) umsun dana atahlang chu AKT jong nasatah a analhangsap KNO Spokesperson Pu Dr Seilen Haokip in anapohdoh thusim a hetkhah le kiseikha beh jong hilou mipi’n adeilou jeh a analosamsa ‘Khochungte’ ahie. Recons lekhabu page 13 (v) na-ah hiti'n akisei e: "Thadou khella Khochungte hisah ding thu: Ipu ipa te’u Khul a hungpot doh jouva ana chenna’u khomasa pen min chu Khochung ahi’n, Vaiphei, Hmar, Simte kitibang a chenna mun min ahi. Isopi houvin jong Khochungte tia eina kou’u ahi. Kilungtona umjo dia lunggel nei leh nam ngailut lungput pum in, Dr. Seilen Haokip in hilchet lhangsap (seminar) ahinbolleh, Thadou tribe min amanlou ding dattheilou miho’n ana doudal un, anating kit tauve. Hiche min hi tukhang thah tamtah in phapen ding ham tin jong ageluve." A last line a Khochungte hi tukhangthah tamtah in phapen ding ham tin jong ageluve atihi Recons hon amaho lunggel akiseinau hitei ding ahi. - ‘Khochung’ kiti thucheng kimuna lekhabu/record khatseh umsun a kisei chu John Shakespear in anasut 1912 kum a publish kibol ““The Lushei Kuki Clans” page 190 na ‘The Thadou Clan’ kisutna khu ahi (mundang hoima a kimulou/kiseipohkhalou a kisei ahi). Hicheah chun ama’n hiti hin asei e: “The original habitation of this clan is said to have been Kochuk, situated very far to the south of Manipur” (Hiche phung/phumgmiho anachennau masapen chu Manipur lhanglam a gamlatah a um Kochuk hi in akisei e). “Here I must differ from Colonel McCulloch, who says the traditional home of the Thados was in the north”” (Hichea hin Colonel McCulloh in apu-apau khang a pat Thadoute chenna chu sahlam joh ahi ati chu kanielkal e). Hiche a Shakespear in Thadou clan atihi phung 4 – Doungel, Sitlhou, Haokip le Kipgen – ho aseina ahi, page 190 nama-ma ah asei in ahi (“The four main families are the Dongel, Shit-hloh, Haukip, and Kipgen” ti’n asei in ahi). Pu Doungel chu Pu Thadou (tribe min hung kondohna Thadou hilou) upa ahi atina jong aumkit nai. - Thadou thua British te lekhasutna ho akivet le Thadou chu genealogy/phungguithu a koiham tia akhoul ule Sehtha Thadou (Sitlhou, Lhouvum, Singsit/Singson, Haokip, Kipgen, Hangshing, Chongloi ho) bou ahisah jiu va, langkhat a pao khat chondan khat tho hinajal ahilouleh tribe/nam/community hina a akhoul phat ule vang Thadou pao tho jouse ahoupsahkit ji’u ahi ti muthei in aum in ahi. - Nuijat umthimtah, lungdon jong umthimtah khat chu ahile tribe min ‘Thadou’ hi phungmin ahi tijeh mai-mai a ajochana Thadou dougunkei ho’n Thadou (Thadou clan) anachennamun min ahi tia kisei ‘Khochung’ deisahna a ‘Khochungte’ ahilouleh ‘Khochung’ tia tribe min kheldi atiu hi ahi. - Kahinseilona chu hiche thu jong hi akingahna umlouva kiniel/kibaunathei thu khat ahi ajeh chu Pu Doungel chu Pu Sehtha Thadou phungsung a phungbah khat hia asei ahi chule Khochung tia Thadou ho chenna dana Shakespear in asei hi achunga kiseibanga British lekhasun dang khat Colonel McCulloch in ahipoi anati ahi. Hiche Khochung kiti jong hi ‘Kochuk’ kiti joh ahin chule Thadou clan akitile Sehtha Thadou aseina ahin Thadou chu pumin/mimin ahipoi amavang tribe min, nam min ahibouve tihon jong Khochung hi apomkit lou diu ahi. Chule history a munkhat seh a kisei, hijong chu kiseiboi nalaiset, hiche minthah kisah vanga phachom ding kihelou, chukittah le hiche Khochung toh history haosatah le thil ijakai neisa Thadou chu iti kite thei diham tia Khochung reject bolding adimsa a umkit ahi. Chukitleh chulai phat in pulepatechu Manipur lhanglam ahilouleh sahlam (south or north) ah anacheng u jong le chulai phat a bon Khochungte tia kikikoutalou tua achom chom a kicheng ahitah jeh in Khochungte kiti chu tukhang a din ahitheitapoi tiloi adim a umsa ahi. Hicheho jouse jeh a chu masanga Khochung anakilhangsap chu analosamsa ahi. - Recons ho sihnei langnei (biased) ahidan ukhat jong chu Recons lekhabu page 25 na, point 5 na a Pu Ngulhao Thomsong in 1942 kum a Thadou Bible tia Bible aledoh chu evidence/proof imacha umlouva Thadou chilhah ahijeh a Thadou Bible anasah ahi atikhum jeng ahi. Recons hohin Thadou chu Pu Sitlhou, Lhouvum Singsit/Singson (chule Haokip le Kipgen) ho bou dan a asei ahi (page 21, paragraph 1). Pu Ngulhao chun ama Sehtha-Thadou chilhah ahijeh a literature kisutna pao min chu Thadou asah mai mai ahile itidan a Sehtha-Thadou chilhah hilou Pu Longkhobel Kilong in ‘Thadou Lekhabul’ (1924) anajih a Pu Teba Kilong in ‘Thadou Anisuba’ (1926) anajih hintem tihi igelle Thadou anghohnau hi abul abal umlou thu ahi akicheh in ahi. Recons lekhabu page 25, point 5 na a Pu Dr T Lunkim in 1971 kum a Kuki Bible ati chu mitamtah in Thadao pao va bible simtheina’n phatchompi jong leu hen vangset umtah a hiche jeh a kon a hichangei a Kuki dalha le pao thu a kiboina um namajong le thiem achan (justify) kit thou thou uhin sihnei langnei tah a thu ajih u ahi ti aphochen cheh in ahi. - Recons lekhabu page 27, para 3 na-ah “Tunikho dinmun in phung 30 val ho lah ah – Sitlhou, Singsit leh Kipgen – tailou mibul adangse in i-tribe min’u pomthei min khat a khel (rename) ding dei ahitauve” ati kit in ahi. Jabollouna vang hilouva Mibul in adeilou man a aphungmi hon jong adeilou jeng ahipoi. Mi khatleni dei a ikikai diu ham ahilouleh mipi/atamjo dei joh a ikikai diu ham ti thudoh lentah aumsah in ahi. Pu Sitlhou, Pu Singsit le Pu Kipgen bulpiho bouvin Thadou adei jeh a aphungmi ho'n jong Thadou adei a, ahivanga phungdang hon adeilou ding ahile itidan a Thadou kiloikhomna ho a phungdang dang adeh deh a Pu Haokip ho pang ham, Manipur a dia MIL subject a Manipuri bantah a Thadou-Kuki subject la tampen ham chule ipijeh a tribe certificate kilahna le census kijihlutna a Thadou pao tho phungdangmi dimset in jong Thadou akijih uham ti igelle reconcilitaion kiminsah a Thadou semhoi nading hilouva alhahsamna bou kihola kimohdem ahibouve ti akicheh in ahi.

Recons lekhabu ah khun amin ah boipou te tia kiseina jong atamkit thou in ahinla amin apomtheilou jeh maimai uva Thadou tribe min khelding kitikit chu lungdon umtah ahikit e. Thadou pom hon vang Kuki chu chungleng vacha min khat hihen, ipi kiseina hihen lang hoilang a hungkondoh hijongle amin a boilouva (India a) nomenclature/nampi min a kipom jeng ahi. Ahinla, Thadou tribe min kheldi akitipeh le unao tribe dang jousen adalhahsa nomenclature (Kuki) min kheldi ti lhangpsapna Thadou ho lah a pat a jong achamlouva hung lengdoh thei ahi. Hijeh a chu chihthei ngai ahi. Thadou Conclave Delhi 2015 Declarations a Kuki nampi akitundoh kit thei nadia Kuki Inpi Manipur le abahkai hoa Kuki tribes jousen pan alahthei kahse a Thadou Inpi in KIM kipomlou ding ahi tia thuphon aneinung a Kuki Inpi umdan le kisemdan kheldi lunggel thah ahungpendoh hi alhunnading saotah vat nalai hijong le kalsonbe kigotna a lahthei ahi, lungdih le thutah a kibol ahialeh. - Achainalam (Recons lekhabu page 30 banchet a) a proposal abolnauva first point a kipe chu hichehi ahi - "B) Kilungtona ding tribe min ding chu: Pumin-pamin hilou ding ajeh chu pumin pamin ajao tengleh phung a lunglutte ihi jeh un, kinah kibao hung umdoh kit thei ahi". Hiche hin avetsah chu hungun kihoutoh uhite ativang uva Thadou tribe chu mi min a pat hung kisah hihih jong le amaho geldan a pumin khat a kisah ahisah jeh uva Thadou hitheilou ding atiu ahi. Hiche a hi Thadou tribe chu pumin a kiladoh ahipoi tiho dia kihou ngai kit lou ahi. Chuteng le ipimin kisah jong le akhohpoi aumsa ikhetna sau Thadou chu aphajeng e tiho dia jong kihou ngai kit lou ahi. Recons in Khochung bou avahchoi masat a achaina a tribe min kisahding dan propose abol hin Thadou khel a Khochungte tia kisah ding ti akodoh ahitai. Ahinla, mi abangkah khat chun Recons le AKT hi “wolf in sheep’s clothing” (kelngoi vun a sial kivon) tobang liuvin asei un,Khochung chu ahitheilou di henasa a kilepna a aminpat thu u ahin Thadou deilou ahung tamjep khah le AKT hung hatdi ti kinepna a kilhepngolna natoh ahibouve atikit un ahi. Aipi chu hile akibahnalhon chu ahile AKT le Recons lungtup pipen chu Thadou tribehi phungthua suhteldeh ding ti ahipen e. - Chutahle, last proposal a kisei "Ijem tia aumsa Thadou or Mate mama manden ding ahijongle akikhom phung lamkai jouse kinoptona a declaration khat bol ding" kiti hi phung fanatic chule anti-democratic hi kiphondohna khat ahi. Hiche proposal hi ahitheilou ding hetsa ahijeh a kisei maimai ahi akicheh e.

Thadou tribe hi phung bulpi le phunggui, tichu, lenjo-neojo, upat-naopat thua um ahiloutoh lhon a akalval a phung bulpi ho kihakum nadia lom hilou ahi: pao le chondan a tribe min a umsah chu phung bulpi hina a jabolna channa lentah ahi. Thadou tribe hi phunggui thusim toh kikaimat nahnah a phung bulpi khattou in tribe min thua thupeh anei a aphungmi hon ajuilou le amadia kijumsona ahikeu hilouva phung sung a kiboina le phung minsetna jong hithei ahi. - Vetsahna’n, 1983 kum a Haokip People’s Council (HPC) president anahi late Pu Mangkhothong Haokip phat laijin Haokip phungkhai sagi (7) in siel khatcheh tohkhom in Kholmun Vangkho tollaija phungkhop anabol uchun phungkhai sagi hon kithutohtah in Thadou ahinao anaphongdoh uvin Pu Mangkhothong in “Haokiptehi tunia Thadou ihidiu ahipon, ithah hikit diu jong ahipon, aitiha kipat a ahisa ihiuve tin anaphongdoh in hetjingna song jong anaphut un ahi, akiti (song kiphut chu vang akiholmotai akiti). Khonungpeh HPC lamkai ahung kikhel phat in Haokip te Thadou hile hilou vah ahungboi tauvin phunggui thua kibol jong hilou Thadou kiloikhomna hoa Haokip chate pangtheilou ding tichangei thugah ahung umta'n ahi. Ahinla, Thadou kiloikhomna hoa alamkai le aponthopen ho atamjo Haokip ho ahikit in ahi.Geldohthei chu Pu Haokip te laha lamkailui Pu Paokai, Ex-MP, Pu Paokhohang, Ex-MLA le Pu Mangkhothong le adangdang holoi in kilungtohtah a anapom u Thadou/Thadou tribechu tulaikhang a politics jeh ham ipijeh hama loikhat in adeilouman a gahpaimang jeng thei hilou ahi. Recons thulhangsap thua Thadou Inpi thuphon HPC in donbutna apehna ah chun HPC in Thadou tribe thua adinmun akhehnem tahdan in akilang in ahile kipa jong aumthou vin ahi – Thadou tribe hi Sehtha-Thadou phunggui thu hilouva aitiha a inakihetjingnau tribe mina ahinpom thei ding jong kinep aumin ahi. 1957 kum a anakiphutdoh TSA Founder Secretary jong anahi Pu C. Doungel, (IRS Retd) le former Minister, Government of Manipur in Thadou Conclave Delhi 2015 a ahoulimna a Thadou ipomtheilou jeh uva ilah uva boina aum pohnatna thu asei jong chu adihtah a pohnat umtah ahi, hijeh a chu Thadou tribe anapomho jousen kilungtohtah a inapomlai u geldohpum a ipomsohkit thei nadiu lampi ikiholdiu ngaikhoh ahi. - Recons lekhabu a AKT thu kiseina ah khun AKT chu athu in hoilheh danin kilang jong leh Kuki jouse kitona ahitahlou jeh in ahithei tapoi atinai. Mate tribe jong Thangkhal pao le nampon avetsah jeh uva tribe recognition amu vang uva apu-apau khang a pat Thadou pao le Saipikhup, Thangnang, Mongvom le Khamtang hinmangpeh Pu Mate ho di’n ahitheipoi chuleh tribe 4, tichu, Gangte, Thadou, Mate le AKT in akihomthang uvin hijeh hin aboi thou thou ve tia ahitheilou dan asei jong adih e. Manipur a Kuki tribes ho kigollhahna 1951 a AKT chu 1956 a paotho dung juija tribe recognition chun akhel ahitan hiche jounungsang peh 2003 kum a AKT kiti hi 1951 AKT toh kikhe ahi ajeh chu 2003 a kiboldoh hi Any Kuki Tribes kiti jeng ahi’n ipi tribe kiseina ham kiseilou ahi.

Hettemlou jeh a Haokip-Kuki, Khongsai-Kuki, Any Kuki tia tribe certificate kilah jong invalid chethei ahin chuche tribe min a ipiham khat imu le boina kitoh thei ahi. Hiche AKT tribe ikilah le hiche tribe min a pao umlou ahijeh in jong aboithou thou vin ahi. Dongman a Haokip pao, Khongsai pao, Kuki pao etc kimoh tijeng ho chu kilalou ahi. Aipichu hitale, Recons in mona jouse chu apaotheilou achattheilou Thadou apohsah u hi dihlou ahi; Thadou ngoh-ngoh sang a Thadou tribe pomtheilou hon jong ahin pomthei nadiu phungmin hilou (India a jong Govt in anaumsa ahidung juija tribe hina a hetpehna inei nau) Burmese version of Thadou joh chu apaothei lunggelthei hon ihaseijoh u ngai ahi, chutile ilah uva reconciliation kiti chu umtheipen ding ahi. Hichehi Recons ho koma tiemna le challenge kabolna nom jong ahi, society phat nadia. - Kaseinompen chu ahile tribe thu le phunggui thu ahilou louva seimatlou ding Thadou pao le chondan tho le Thadou a hung kihepeh ihijeh uva Thadou hichom hilouchom umlouva Thadou tribe a iumsoh ule kitonapen le phungsung le namsung damnapen ahi ti chu Thadou tribe le phungthu iseitha masang uva kitoh tah a ina um uchun aphotchen set ahi. Phunggui thu le tribe min ihaseithachan uva iboi chehcheh diu ahi. - Amin umlouva la tribe umtheilou ahitah le aumsa chule mi atamjon apom aitih-a inakihetjing nau Thadou hi aphapen ahi tijoh ahin muchendiu chu Recons chung a kinepna ahipen e. - Recons hon Thadou tribe min kheldi tihi a main agenda le condition khat in pansah hih uleh Thadou pom ho jong kihouna table a alouilut jou diu ahi ajeh chu kihoutoh di tichu thupha ahijeh a koima mohda theilou ahi. Langkhat ah hung un lungthengtah le condition umlou vin kihoutoh ute tia alhangsap un alangkhatkit ah lungtheng vanglah in Thadou tribe min khelding ti condition jaona in kihou ute tin mi kouna aneikit uvin amaho le amaho akikal uvin ahi. Thadou tribe min khel nadia kikouna chu amin pomho dia kingolbolna ahilouleh kinoisena tobang ahi, hijeh a chu Thadou tribe pom ho dia chu kihoulo nading umtalou ahi. Hiche hi ivet le Thadou Students’ Association (TSA-GHQ) in November/December 2015 a anaphon bana Thadou Inpi in 15/03/16 ni Eimi Times a Recons agenda le thulhangsap pomlouna le Recons in anatoh angahdia thuphon ananei chu ahiding lom tah ahi. - Recons le AKT campaign kiboldan hi akilona atam in ahi. Tekah in, aninia Thadou chu phungmin ahi tia pansa a dem jeng chule Pathen thu kiselna a nei a thujouva pansa a politics ahilouleh controversial thu (Thadou kidemna thu chu Pathen thu gospel kipana thupha bang a) Pakai houbung theng lahdung a kiseiphongle jeng, akiseina houbung sunga a hitobang thu akiseijeh a boina umdi ham ahilouleh Pathen lunghanna hikha ding ham ti khohsalou khop a. Hitobang political boina thu hoa kona hi houbung ho jong akiventhiem angailheh in ahi. Akivet le dictatorial mindset nei gamsung lamkai hiho/hinom hon mipi ho thujothei nadi le a control thei nadiuva Pathen min pan a politics anabol jiu toh akilou vin ahi. Thusim a kisei gimnei politically Christian hi Hitler jong chun German mipi athujo le a control thei nadia houthu/Pathen thu mangcha a Aryan race hi Christian ho chu Jews ho amudasah a Jews te million a sim anatha a German Christian ho mama jong anasuhgenthei ahi. - Hetbe ding khat chu AKT boipi ho toh Reconciliation Forum ahilouleh Recons kiti hohi a aboipiu kibang ahi.

AKT mipi pomsah nadinga chun Thadou hi phungkhat bou ahi, Thadou achih masat jeh a Thadou min anaput sah u ahi tin khangdong college students ho seminar abol pi un, Thadou nanaopao min naput u ahi tin mipi lung tongkhathei thu mangchan thu anathe leuvin ahi. Hiche aseijeh uchu mihon Thadou ahin deilou tengleh AKT a hunglut diu tina ahi ahivangin a fail tan ahi. Alheplhah houvin AKT kilah sang in tribe dang Simte, Zou, etc akilahjo tauvin AKT imading atideh pouvin ahi. Tun AKT ho natohchet chu Recons kiti hon abolkit un Recons brochure a khun Thadou chu phung khat dan in AKT ho thusei chet aseikit un ahi. Hijeh chun AKT leh Recons hi society sukeh ding natong danin aumdoh tan ahi. AKT in Kuki jouse tribe min khat a umding anasapphong, ahivanga Thadou/Thadou tribe douna, chule Recons in Thadou pao tho jouse tribe khat a umkhom ding alhangsap in ahivanga Thadou tribe douna ma-ma hikit ahi. Hicheho ivet le mibangkah in AKT leh Recons hin kithoa conspiracy/kijonkopna anei ahi atiu jong ginmoa aumnathei aum in ahi. - Thadou khel a phajodi anaumlou jeh a eiho (Thadou pao le chondan thoho) deidungjui/phatsahna a Indian Government in jong anaumsa Thadou tribe hetpehna a October 1956 a chu Thadou min a tribe recognise inabol u ahi’n, hiche joulangpeh a Thadou khel ding min holna aumjing vang in tunigei hin tu le khonung a Thadou khel a phajo ding mudoh ahipo’n ahi. Atamjon apom aumsa khat hatsah ding joh chu aumlou khat semthu bolthu ding sanga gamchenga phajo ahi. Thadou tribe pomnomlou ho hin hetthemlou jeh ham khat a Thadou chu phungmin ahijeh ahi ati’u ahin, Thadou tribe hina, tichu, phungmin hilouva paokhat chondan khat thoho kihetna nam min ahinapa chu ahetthem teng ule ahinpom diu ahi; hiche ding joh a hi kisahboi phachom joding ahi. Thadou hi pao le chondan dungjuija kihetna (tribe) min hinama jong le kahlahkhat a koitobangkhat chu phunggui thua Thadou tribe pom jong um maithei ahi, ahinla hiche chu mimal (personal) choice ahi’n chutia Thadou apom jeh a Thadou tribe ahipoi tia Thadou society a pat delmang ding/excommunicate ding tina ahideh poi. Tribe certificate ikilah teng ahilouleh census a tribe min ikijihlut phat leh ‘Thadou’ bou kijih jeng, phung le chang thu ahilouleh anung ama a hapbe koibe ding umlou ahijeh in hiche thua kinel boutam nading le boina ima aumpon ahi. - Achunga clan-based (phung thua pansa) a thu kisei hi Recons ho thupi kipumkhat le kihoutoh toh jong kikal ahi.

Thadou te hi Old Thadou, New Thadou kiti jong umlou ahi. Thadou chu Thadou hung kitipeh ho hijeng, Thadou jouse kibangchet ahi – ahina lot lot a phungbulpi ho bou khutdopna um khalou ahi. Ihina chu midangkhat sei vang a kimohkhel thei lou ahi. Tulaikhang kivaipohna democracy toh kitoh a atamjo phatsah sah kitina ahijong le phungbulpi ijat in apoma apomlou ham tia kive ding hilouva mipi joh a vet ding ahinalai e. Hiche toh kimat a hetding khat chu Thadou deilou hoa dia option kisemdoh AKT umjou nung (AKT hatding phat laitah) 2011 Manipur Census a jong Thadou tribe population 2.15 lakhs ahin Manipur a dia atampen (single largest) tribe ahipeh in ahi. - Kum ijat hamkhat tribe min Thadou deilouna natohna aga kimusun chu Thadou tribe min kheldohna la hichom lou, nam sung a kikhentelna cheh, imalam jousea khansuhna ahilouleh machalmona le adehset a amin deilou ho kisuhnohphahna bep ahi ti kichen tah a akihetdoh nung a hi larger interest a problem sang a solution joh chu ikhohsah diu joh ahi. Thadou tribe hi ahinabanga ipomtheisoh teng ule tribe tamtah kikhaikhomna nampi Kuki jong ahina dihtah banga hung umkit bep ding ahi. Thadou tribe ahinabang a ipomthei lou ule tuchan a Thadou te bou in ipom nahlai u Kuki hi sochatna hijoulou cheh cheh ding amin kheldoh di tiloi le adalha a adang a lut loi hung tamcheh cheh cheh bep ding ahi. - Masanga Kuki a anakikhailha tribe dangho jouse, Old Kuki anakiti ho tua Naga a um ho le New Kuki anakiti ho tua Zomi le Mizo a um hon ama ama tribe cheh a lungmong tah a aumthei uva Naga, Zomi le Mizo a kona boina ima umlou hela a tribe u khantou machalna achepi’u khu ipijeh ham ti kikholphat angai in ahi. Hiche hin Kuki tilou lampi dang aumpoi tia aumsa tribe identity suhmang jeng thei ahipoi ti avetsah ahi. Ichihtheilou uva Kuki min a Thadou dehna thu le la chule natoh achejompeh le Thadou tribe in jong aphatthei akhantouthei nading chamdiel a Kuki dalhahna exit route phapen khat ahin kilhen thei nahlai ahi. - Recons lekhabu hi apatna a pat achaina gei ivet le phungthu/phungbul kalval ima, Thadou history bul jeng jong, amuphahlou uham ahilouleh apomnomlou ham jeh a Thadou adeh u ahipen e. Agomlama seidia chu Recons kiti ho agenda hi (consciously or unconsciously a) solution-focused hilouva problem-focused ahi e ti akimuchen in ahi - hichehi inam uva dia vangset umtah ahi. Thadou thu a boina ihetdoh jouva chu inungvet hiu/ivetsaobe hiu leh solution ding chu kimu ahitai. Thadou tribe min kheldi ti hi Khochungte tipou, AKT tipou va Thadou sunga loi khat in anaboipisau va anahitheilou ahin, ipijeh chom a tua hithei chom diham ti jong gelphat kit angai e. Paokhat, chondankhat tho Thadou tia aitih a pat hung kihejingpeh mite jousen Thadou tribe ipomsoh thei nadiu joh a pan ilahsoh diu deisah ahilheh in ahi ajeh chu hiche hi ahithei ding le abailam pen ahi, beilamtah a kikhelthei jeng ding dana Thadou tribe min kheldi tijeng sang a. - Hetdia poimo tahkhat jong chu oral tradition anajuite ihiu vin tribe min Thadou titahlou phung ho, tekah a, Pu Guite, Pu Doungel, Pu Lunkim, Pu Haokip etc sunga phungbah ho ahoilaina hiham ti kiholmo a akigoultoh theilou le sating kipehje aumtheilou jeh a by acceptance a koibah ham khat noi a kimoh lahlut tiho vel kinahkibaunathei thusim chomchom le kidang tahtah jong um ahi. Chule phunggui kisuut theilou le phungmang ahilouleh phungdang, jatdang ahilouleh namdang mi ipijeh ham khat a phungmi a kilalut tiho jong um ahi. Hicheho pihi insung, kholai gamtin le media changei a japi kihoulimna le kinielbautamna hung hikha le phung ho dia jachatna le molphouna sangtah hiding ahi. Tribe min Thadou hi phungmin kila ahibouve tia phunggui thua kiniel bautam ibol bebeu le Thadou tribe sunga phungho phunggui thua pandora’s box ihin hondoh khah ule tua Thadou demdem phungho jong hi Thadou aseiboi sang uva hung khoh jothei ahi. - Australia a indigenous mite jong hi tribe atamjo khu apaomin uva kikou le kihe ngen ahi. Apaomin u jeh le itih kum chet a apaomin hou le atribe min hou hung umpan ham koi in anaminsah ham ti hetlou jeh in kinah kibou aumpon ahi. Naga kiti hon bon anam min u Naga, naked/sagohkeu tina - sagohkiuva um mite tina - apomthei uva khubanga adopsang uva akithangatpiu le tribe min Thadou chu mi min ahi itiu jong le kihetnamin ahitah le ibola ipomdau va ikithangatpi dadiu ham? Thadou tribe ngailua aphat-akhantou nadia pan halahjep poupou “Thadou Fanatic” kitikhum jeng ho tobang hin Thadou tribe min akikhelsah di jong hilou, aphachomdi khatcha ahinpohlut ding jong hilou ahi, hijeh a chu hitobanga lunggel pilhingloutah a kihouna ho jong ingah diu va ikithumop diu ahi. - Pului Sehtha Thadou jong anaum nante, Pu Chongthu chapa tahpenpa khanggui a miupa Thadou tia kisei jong umkhat nante, Pu Elmun Thadou kiti jong um maithei umlou maithei ahi chule Pu Chongthu pen masangpeh a Thadou kiti jong umkhat maithei ahi. Ahinla hetdia poimopen chu ipao min uhi Thadou tilou mindang ah akihekhapoi, akiseikhapoi ti vang kinielna bei ahi – hiche language le culture a kipom Thadou hi ahi ikitonadiu pen, hiche hi ahi Thadou Inpi le abahkai Thadou kiloiklhomnaho le Thadou tribe pom mipi in asei le achepi chu. Chule pute paten athusim u achomchom a anakisei jeh uham ahiloule akilekhel jeh ham ahiloule pao kibahlou jeh a kihekhel jeh hama British lekhasun hon jong achom chom le akitohlouva isutpeh u jong um ding ahi. Aipi chu hitale,

Thadou chu koiman phungmin a akijih le akikoi jong hilou, Thadou phungkhop kiti jong umkhalou, Thadou Phungpi kiti jong umkhalou, Thadou min a sating, sangong kipe le kila ti jong umkhalou, tribe min a Thadou pom jeh a ingam-chigam, lolkhah ahilouleh le sating-sangong petheilou latheilou jong ihipou ve, amavang Thadou hi aitih a pat pao khat chonna khat thokhom mite kihetna tribe min ahi chule mite le government hon ihetnau ahi ti vang kinielnabei thutah le thudih ahi. Hiche hi phunggui thu le tribe min mehbeh nahnah a kiniel kibau ho ingah uva isanthei u angai e achutiloule tribe min thua boina hi beitih aneilou ding ahitai. - Recons in Thadou pao thoho lah a kihoutohkitna ding, khat a um nading ngaitoa kibol ahi tin ijat in seijong le aseijouseu phung-thua (clan-based a) pansa ahijeh in Recons umdoh jouva pat in phungthu le 'Thadou' le 'Kuki' thua kinil-kibau le kilangkhenna athahbeh in asangdoh kit tan, kitonading sang a kikhentelna le kibungkhenna cheh asohdoh tan ahi. Houbungsung kisen a hitobang boina thu apohlut tah jeh uvin houbungmi ho kah a jong kihetkhelna le kinil-kibauna asodohlo tan ahi – hou-in pam a vapal kijoh sang a khohcheh ahitai. Houbung sung kisen ah Thadou le Kuki thua kilangkhenna hung umdoh le iti jong Pathen ihouthei diu tam lungkham umtah ahi. - Hitobang Recons natoh-ho achejompeh le namsung a boina le vangsetna sangtah hung sohthei ding dinmun chan aumdoh tan ahi. Recons hi aphapen a seidin Thadou tribe min a unity umding deilouho kiloikhom ahi, asepen a Thadou pao thoho lah a kimuda le kikhenteltheichan a kikhentel ding deiho ahi, ti’n akiseitan ahi. Recons in kum 60 jentahtribe min Thadou deilou jeh a Thadou pao thoho lah a unity umtheilou ahi atina a kum 60 ati hi thudih loutah hijong leh, adihdan in gah kilahen langhile kum 60 jen Thadou tribe min kheldohdi akiti vanga kikheldoh joulou chu tua Thadou tribe activeahung hikitnung, adeh a tribe min Thadou pomho noplouna a, akheldohjou mongdiu hinam, hichu iti kitonading kiti thei diham tithudoh lentah aumdohsah in ahi. Chule, kum 60 sunga tribe min Thadou kheldoh ding kiti hi adih in gahkilatadileh, Indian Government in anaumsa Thadou tribe hetpehna aneina diamond jubileeamujou changeia jong akikheldoh joutahlou leh khelding ti lunggel hi pailhah a aumsa ahisa hi kilungtohtah a tuhchahkheh a ahatnading a pan halah a lahding joh ahi tihi mipi tamtah dei ahikit in ahi. - Vangsetpi’n Recons hon tribe thah khat, Khochungte ham All Kuki Tribe ham, All Thadou Tribe ham ipi ham minthah khat, boldoh jeng jong leu aminthah deiho bou vin akilah diu minlui Thadou deiho Thadou a umden thou thou diu ahi – hiche chu ahile athah kibol chu ipi phachom mong hinam? Thadou pao thoho laha kikhentelbena alina (4th) tribe hibep lou diham? Recons hon jong kibolkhel ahi atiu - aninia Manipur state a dia bou hi- AKT (2003) le Mate tribe (2012) kibolkhel chu phakhopset hitalou ham? - Inamsung uvah hin khankho le kingailutna vang aumnalai nai, ahinla ngolpi liuva phung le chang thua a na kihatohna le thu kihaseina society ahijeh in khantou-machalna le kitona alhasam lheh e tihi phatah a ihinmu uva aga jong lohsoh liuva inehnung uva hi hitobang lungput ho pailhah phat mong mong hitalou ham ti ngaitocheh ute. Phung thu seinading dola seiding, akalval a seilou ding chule seilounading dol ahilouleh seilouva aphatjoh nading mun le phat a seilou ding chu idiuva aphapen hiding ahi.

Tribe min Thadou pomhon jong apomnomlou ho’n ahinpomsoh thei nadiuva Thadou/Thadou tribe thutahle ahinabangtah a hetthemthei nading awareness programs/activities ho habol angai in ahi. Hiche hi adeh a Thadou lamkaiho le namsung/Thadou pao thoho lah a aching athem, kineppi umtahtah alen alal chule lamkaiho mopohna ahi. - Thadou ten i tribe u Thadou donselouva Kuki chu Thadou tribe dana ibolbol uva Kuki bou inangolpi sot behseh nalam uva Thadou jong Kuki jong imalam jouse, adeh a literature le culture, a hibanga nemsuh a boinalou dingbeh boina in itoumden u ahitai tihi geldohkit a pan ilahthah u angai lheh in ahi. Hijeh a chu phat sottah chatlinglou tobang a anaum ahivanga tua ol-ola hung machal jing Thadou movement hi itosotsoh kei uva pan ilahdiu apoimolheh in ahi. Hitoh kilhona chu imasang uva um Manipur Sadar Hills a um Ngahmun Vanghkho a 6-8 April 2016 sung a kimang ding Thadou Cultural Festival hi Thadou te chon le khan, ihina’u le kilungtona chule Pathen jala iloupinao thusim teho domsangkit dinga kigotna neipum a igaldot diu chujong leh kipah le thanom tah a ihinathei cheh uva pan ilahsoh diu ahi. - Thadou hi Thadou tribe kipomdan toh kikal a phung khat ahi ti thu hi kum phabep masang bouva hung kiseipan ahi'n, hiche boina thu hung kipat masanga iki lungtonau le ikipumkhatna pau joh chu focus a boina isuhlhapdiu joh ahi. Hichun ‘Reconciliation’ kiti kihouchamkitna aumsah joh ding ahi. Itile Thadou tribe a lungmongsel a iumsoh uva phung le chang le identity a boi talouva phung le chang kalval ivet uva tribe khat, nam khat hina a khantou machalna le kingailutna le kikhotona chule kichamna lampi joh ijout diuham ngaitokhom a kuultah ahi. Pao khat chondan khat thoho ibon uva hiche thutah a hi ikibulphu diu angaikhohpen in ahi, boina suhlhap tahtah ding itiu ahileh.Thadou pao thoho kihoutohkit nadinga condition bei a kihoudi iti le kihoudia kikouho ahilouleh stakeholders ho jahda ding condition khatcha umsahlou ding tribe min khelding adu-ada tihojaolouva akikouho jouse tahsantheitah a kouna nei angai in ahi. Achutiloule reconciliatiation ahilouleh thucheng ngaitahtah ijat in kisah henlang Bible chang ngaitah-tah ijat kimangcha jong le kihoutoh malah khohcheh thei ahi. - Problem-focused hi negative ahin, solution-focused vang positive ahi. Positive hiding joh ikilhen diu apoimo lheh in ahi ajeh chu hichea kona nam khat hina a lolhinna inei diu ahi. Hijeh chun boina jeh ihetdoh jou nung uvin hiche boina a chun kiphumden louvin thakhat le lungkhat a ina um pet u dinmun joh chu nungvil utin hiche dinmun pha le hoi joh a chu pansa in nam ahiluleh society semphat nan pan latao hite. - Narrative approach a kiseibang in thilsohsa khat chu akinungkouthei poi, ahinla a meaning ikhel thei uve. Hibang chun Thadou a kihe ihitah ule kiletsahna, kichangngailutna, kimudana, fanaticism, kibungkhenna, kiphulahna le kiloupisahna ho pailhau hitin Thadou le Kuki min a seikhel bolkhel ho jong kingaidam utin tu le khonung ding ngaitona’n Thadou chu tonlai a pat a kilungtoh tah a inapomsoh hel bang uvin ahinabang tah in kisanjeng utin kidalsah le kineisahtum umlou vin, ahinlah kineisahsoh hiel utin, phatchompisoh kei kit tau hite. Dinmun pha le hoi a pansa a natoh thilbol chun tohga hoi le pha asodoh ding ahi. - (Hiche article a thu kisun hohi koima changval ahilouleh kiloikhomna ahiloujongleh phungkhat atum a mudana le seisetna ahipoi.Hetdan, ngaidan le mudan kibahlouna aumle kihou thei ahi) - Thujihpa (Jalun Haokip) hi Manipur a peng le hung seilen ahin 2010 kum a Flinders University, Adelaide, Australia a Master of Social Work (MSW) anaichai jouva South Australia Government noi a social worker hina a kum thum le keh na anatoh jouva tutua hi Western Australia Government noi a social worker hinamama a kum 2 ahintoh jom jing ahi. Hiche atohsunga hi Indigenous Australian mite, mikangte le namtin lah a ahin tohjing peh ahi. Koitobang akijahmatpi nom hon a email jalunhaokip@gmail.com a hi kijahmatpi thei ahi.

- References: - 1. Carey, Bertram S. and H. N. Tuck; 1896, “The Chin Hills : A History of the People, their Customs and Manners, and our Dealings with them, and a Gazetteer of their Country,” Rangoon. 2. Reid, AS; 1893, Chin-Lushai Land, Calcutta 3. Shakespear, J; 1912, “The Lushei-Kuki Clans”, London.e 4. Khup Thang; (2015), Thadou Hungkondohna 5. “Reconciliation Brochure, (Tribe min chungchanga Kibaotamna Suhthengna ding Lhangsap)”, 2015; published by Reconciliation Forum. 6. Haokip, Ngamkhohao, “The Thadou Tribe: Searching For Unity and Progress.”